खोके यावरून रॅप साँग करणाऱ्याला जेलमध्ये टाकले. त्याला अटक करून संबंधितांनी खोक्याचे एक प्रकारे समर्थन केले आहे अशी टीका विरोधी पक्षनेते अजित पवार यांनी केली. ज्येष्ठ पत्रकार श्याम दौंडकर लिखित, ‘ धडपड ‘ या पुस्तकाच्या प्रकाशन सोहळ्याप्रसंगी अजित पवार बोलत होते.
यावेळी ॲड. अमरसिंह जाधवराव, ज्ञानेश्वर भोईटे, राष्ट्रवादी काँग्रेसचे शहराध्यक्ष प्रशांत जगताप, पत्रकार प्रतिष्ठानचे अध्यक्ष जितेंद्र अष्टेकर, पत्रकार संघाचे अध्यक्ष स्वप्नील बापट, चंद्रकांत भुजबळ आदी मान्यवर उपस्थित होते.
पवार म्हणाले, “सध्या लोकशाहीच्या चौथ्या स्तंभावर जाणीवपूर्वक हल्ले सुरू आहेत. सध्या घडत असलेल्या घटना पाहता अघोषित आणीबाणी येत आहे की काय असा प्रश्न पडतो. कोकणात पत्रकाराची हत्या झाली. मागील आठवड्यात एका पत्रकाराला मुख्यमंत्र्यांचे कार्यकर्ते दम देतात. छत्रपती संभाजी महाराज नगरमध्ये खोके यावरून रॅप साँग करणाऱ्याला जेलमध्ये टाकले. खोका हा उल्लेख केला परंतु, त्याला अटक करून संबंधितांनी खोक्याचे एक प्रकारे समर्थन केले आहे. पिंपरी चिंचवडमध्ये पत्रकाराला शाई फेकीच्या गुन्ह्यात गोवले गेले. तेव्हा पत्रकारांनी एकजूट केल्यावर त्या पत्रकाराला गुन्ह्यातुन वगळले गेले. ही बाब लोकशाहीच्या दृष्टीने घातक असून, अभिव्यक्ती स्वातंत्र्याची होत असलेली गळचेपी महाराष्ट्राच्या प्रतिष्ठेला शोभणारी नाही. सुसुंकृत महाराष्ट्रात हा प्रकार एक शोकांतिका असून, असे हिणकस प्रकार थांबले पाहिजेत. यासाठी सगळ्यांनी एकजूट करण्याची गरज आहे. म्हातारी मेली तरी चालेल पण काळ सोकावता कामा नये. यापुढे पत्रकारांवरील हल्ले सहन केले जाणार नाहीत”
शून्यातून विश्व निर्माण करणाऱ्या लोकांची संघर्ष गाथा धडपड या पुस्तकामधून मांडली आहे. केवळ राजकारणी व्यक्तींच नव्हे तर समाजकारणात काम करणाऱ्या सर्व सहकाऱ्यांनी हे पुस्तक अवश्य वाचावे असे आवाहनही पवार यांनी यावेळी केले. पुस्तकाचे लेखक श्याम दौंडकर यांनी प्रास्ताविक केले, प्रदीप देशमुख यांनी सूत्रसंचालन केले.
