ठाण्यात एक अतिशय गंभीर घटना घडली आहे. ठाण्यातील उल्हासनगर परिसरात राहणाऱ्या डॉक्टरच्या घरात घुसून डॉक्टर आणि त्यांच्या कुटुंबीयांवर जीवघेणा हल्ला करण्यात आला. दहा ते बारा जणांच्या टोळक्याने हातात लाठ्या काठ्या घेऊन डॉक्टरच्या कुटुंबीयांना मारहाण केल्याची धक्कादायक घटना घडली आहे. या घटनेचं सीसीटीव्ही फुटेज आहे आता समोर आले आहे.
उल्हासनगर परिसरात राहणाऱ्या डॉ. सागर धुतोडे यांच्याबरोबर हा गंभीर प्रसंग घडला आहे. उल्हासनगर मधील कॅम्प नंबर पाचच्या कैलास कॉलनी रस्त्यावरून डॉ. धुतोडे हे घरी जात असताना, एक बाईकस्वार तरुण स्टंटबाजी करत होता. धुतोडे यांनी काळजीपोटी या तरुणाला हटकले. मात्र याचा तरुणाला राग आला. त्यानंतर रात्रीच्या वेळी दहा-बारा जणांना सोबत घेऊन हा तरुण थेट डॉक्टरांच्या घरात घुसला. या तरुणांच्या हातात लाठ्या काठ्या होत्या.
याच काठ्यांनी डॉक्टर आणि त्यांच्या कुटुंबीयांना मारहाण करण्यात आली. या हल्ल्यात डॉक्टर सागर आणि त्यांचा भाऊ गंभीर जखमी झाले आहेत.
अतिशय शुल्लक कारणावरून या टोळक्याने डॉक्टर आणि त्यांच्या कुटुंबीयांना जबर मारहाण केली. ही घटना डॉक्टरांच्या घरातील सीसीटीव्ही कॅमेरा मध्ये देखील कैद झाली. त्यांनी तात्काळ पोलिसात धाव घेतली व हिललाईन पोलिसांनी सीसीटीव्ही फुटेजच्या मदतीने आरोपींची ओळख पटवली. अखेर या हल्ल्याप्रकरणी आरोपी अजय वाकोडे, संदेश बनसोडे यांच्यासह त्यांच्या इतर तीन साथीदारांना पोलिसांनी अटक केली आहे. दरम्यान घटनेचा पुढील तपास पोलीस करत आहेत.
