Worli Hit and run | जुहू मधील बारमध्ये मद्य सेवन, नशेत लॉन्ग ड्राईव्ह अन् वरळीत अपघात… वाचा अपघाता आधीचा संपूर्ण घटनाक्रम
पुण्यातील हाय प्रोफाईल पोर्शे कार अपघात प्रकरणानंतर असंच एक प्रकरण वरळीत देखील घडले आहे. मच्छी आणण्यासाठी बाजारात गेलेल्या दुचाकीस्वार पती-पत्नीला मागून आलेल्या बीएमडब्ल्यू गाडीने जोरदार धडक दिली. ज्यात पत्नीचा जागीच मृत्यू झाला तर पती गंभीर जखमी आहेत. तरीही बीएमडब्ल्यू गाडी शिवसेना शिंदे गटाचे उपनेते राजेश शहा यांचा मुलगा मिहीर शहा चालवत असल्याची शक्यता आहे. याप्रकरणी राजेश शहा यांना पोलिसांनी ताब्यात घेतले आहे.
नेमकं काय घडलं ?
वरळीतील ॲट्रिक मॉल जवळ सकाळी साडेपाच वाजण्याच्या सुमारास हा अपघात झाला. रविवार असल्यामुळे सकाळी मच्छी आणण्यासाठी बाजारात निघालेल्या पती-पत्नीच्या दुचाकीला भरधाव वेगात आलेल्या बीएमडब्ल्यू कारने धडक दिली. या कारने महिलेला जागीच चिरडले ज्यात महिलेचा जागीच मृत्यू झाला तर तिचे पती हे गंभीर जखमी आहेत. अपघात झाल्यानंतर शिवसेना उपनेते राजेश शहा यांचा 24 वर्षीय मुलगा मिहीर शहा हा ड्रायव्हरसह फरार झाला आहे.
अपघाता पूर्वीचा घटनाक्रम काय ?
प्राथमिक माहितीनुसार राजेश शहा यांचा मुलगा मिहीर शहा हा रात्री जुहू येथील प्रसिद्ध बारमध्ये गेला होता. त्या ठिकाणी त्याने मद्य प्राशन केले. त्यानंतर तो गोरेगावला गेला. पुढे घरी गेल्यानंतर त्याने आपला ड्रायव्हर राजरुपी राजेंद्र सिंग बिडावत याला जायचे असल्याचे सांगितले. व ड्रायव्हर सह गाडी घेऊन मिहीर शहा बाहेर पडला. लॉंग ड्राईव्ह साठी तो मुंबईत आला आणि पुन्हा गोरेगावला परतत असताना वरळीत हा भीषण अपघात झाला. अपघाता वेळी गाडीत मिहीर आणि ड्रायव्हर हे दोघेही होते. या सर्व प्रवासादरम्यान मिहीर शहाने मद्य प्राशन केल्यामुळे तो नशेत होता. अपघात घडला त्यावेळी गाडी देखील मिहीर चालवत असल्याची शक्यता आहे. अपघात झाल्यानंतर मिहीर ड्रायव्हर सह फरार झाला आहे. तसेच सकाळपासून त्याचा फोनही बंद लागत आहे. याप्रकरणी राजेश शहा यांना पोलिसांनी ताब्यात घेतले असून पुढील तपास आणि मिहीरचा शोध पोलिसांकडून सुरू आहे.