यवतमाळ : यवतमाळमध्ये (Yawatmal Crime) एक धक्कादायक घटना समोर आली आहे. यामध्ये धारदार शास्त्राने दोन तरूणावर प्राणघातक हल्ला करून एकाची निघृणपणे हत्या केली आहे. यातील एका घटना शहरातील राणाप्रताप गेट परिसरात तर दुसरी घटना उमरसऱ्यातील बाल गोकुलम स्कुलजवळ घडली आहे. अंकीत गणेश कुकडे (28) रा. उमरसरा असे मृत तरुणाचे नाव आहे तर स्वप्नील विठाळकर (18) रा. रामनगर, यवतमाळ आणि अजिंक्य नाचपेलवार (24) रा. शांती नगर, वडगाव, यवतमाळ अशी जखमींची नावे आहे.
काय घडले नेमके?
प्रज्वल रोहनकर (19), यश सुभेदार (21), श्रेयश राऊत (21) आणि एका अनोळखी तरूणाविरोधात गुन्हा नोंद करण्यात आला असून 2 मारेकऱ्यांना ताब्यात घेण्यात आलं आहे. शहरातील वडगाव येथील अक्षय नाचपेलवार याचे राणाप्रताप गेट परिसरात चाहाचे दुकान आहे. रविवारी रात्री 9.15 वाजताच्या सुमारास अक्षय याचा चुलत भाऊ अजिंक्य नाचपेलवार हा मित्रासोबत चाहाच्या दुकानाजवळ गप्पा मारत होता. यावेळी प्रज्वल रोहनकर, यश सुभेदार, श्रेयश राऊत आणि एका अनोळखी तरूणाच्या टोळक्यांनी घेवून धुमाकूळ घालत शिवीगाळ केली. यावेळी अजिंक्य याच्यासोबत वाद करीत त्याच्यावर धारदार चाकुने वार करण्यात आले. यानंतर आरोपींनी घटनास्थवरून पळ काढला.
त्यानंतर या टोळक्यांनी आपला मोर्चा उमरसरा परिसरातील बाल गोकुलम स्कुलकडे वळवला. यावेळी त्या ठिकाणी उमरसरा येथील अभिमन्यू देऊळकर, अंकीत कुकडे, स्वप्नील विठाळकर, आणि श्रेयस मोकळे आदी मित्र गप्पा करीत होते. अशात रात्री 10.15 वाजताच्या सुमारास प्रज्वल रोहनकर, यश सुभेदार, श्रेयश राऊत आणि एक अनोळखी तरूण दोन दुचाकीने त्या ठिकाणी आले. यावेळी प्रज्वल याने अंकीतला मी आताच राणाप्रताप येथून मर्डर करून आलो आहे. आम्ही इथे आलो कोणाला सांगू नका, चला निघा इथून असे म्हणून त्याच्या जवळील चाकुने अंकीत याच्या गळ्यावर आणि पाठीवर वार केले. त्यानंतर स्वप्नील विठाळकर याच्या कानावर आणि गालावर वार केले. तसेच त्याच्यासोबत असलेल्या यश सुभेदार याने अभिमन्यू देऊळकर याला मारहाण केली तर श्रेयश राऊत याने त्याच्यासोबत असलेल्या तरूणाने श्रेयश मोकळे याला मारहाण केली.
यानंतर जखमींना तातडीने रुग्णालयात दाखल केले. मात्र त्या ठिकाणी डॉक्टरांनी अंकितला मृत घोषित केले. तर स्वप्नील विठाळकर याच्यावर उपचार सुरू आहे. या प्रकरणी चौघांवर अवधुतवाडी पोलीस ठाण्यात खून, खूनाचा प्रयत्न केल्याप्रकरणी विविध कलमान्वये गुन्हा दाखल करण्यात आला आहे. ठाणेदार ज्ञानोबा देवकते यांच्या मार्गदर्शनाखाली सहायक पोलिस निरीक्षक धैर्यशील घाडगे, राम भाकडे या प्रकरणाचा पुढील तपास करत आहेत.
