पुणे : पुण्यामधून फसवणुकीचे (Fraud News) एक मोठे प्रकरण समोर आले आहे. यामध्ये लष्करी गणवेश घालून मोठ्या अधिकाऱ्यांच्या ओळखी असल्याचे सांगून 9 तरुणांना लष्करात भरती करण्याचे आमिष दाखवून आरोपीने 28 लाख 88 हजार रुपयांना गंडा (Fraud News) घातला आहे. आरोपीने पुणे, धुळे, औरंगाबाद, सातारा येथील तरुणांची फसवणूक केली आहे.
काय आहे संपूर्ण प्रकरण?
या फसवणुकीप्रकरणी कोंढवा पोलिसांनी प्रमोद भिमराव यादव (वय 27, रा. येवलेवाडी, कोंढवा) याच्याविरुद्ध गुन्हा दाखल केला आहे. याप्रकरणी नाशिक जिल्ह्यातील नांदगाव येथील एका 29 वर्षाच्या तरुणाने कोंढवा पोलीस ठाण्यात तक्रार दाखल केली आहे. ही फसवणुकीची घटना सप्टेबर 2022 ते 18 जून 2023 दरम्यान घडली आहे.
ATM FRAUD ! एटीएम वापरताना काय काळजी घ्यावी ? फसवणुकीपासून व्हा सावध
आरोपी प्रमोद यादव हा लष्कराचा गणवेश घालून लोकांना आर्मीमध्ये अधिकारी असल्याचे सांगत होता. तसेच माझी मोठ्या अधिकार्यांशी ओळख आहे. असे सांगून लोकांना आर्मीमध्ये भरती करतो, असे आमिष दाखवित होता. त्याने आपल्या जाळ्यात सातारा, धुळे, औरंगाबाद येथील तरुणांना आपल्या जाळ्यात ओढले होते. आरोपीने या तरुणांकडून 28 लाख 88 हजार रुपये उकळले. पैसे देऊन एक वर्षाहून अधिक काळ झाला तरी भरती न झाल्याने आपली फसवणूक झाल्याचे लक्षात आल्यानंतर या तरुणांनी पोलिसांकडे तक्रार दाखल केली. या प्रकरणाचा अधिक तपास सहायक पोलीस निरीक्षक बाबर (API Babar) करत आहेत.