मुंबई : मुंबई ट्रॅफिक कंट्रोल धमकीच्या मेसेजमुळे मुंबई पोलीस सतर्क झाली आहे. 26/11 सारखा हल्ला घडवून आणू असा धमकीचा मेसेज आला असल्याचे समजते . तर काही दिवसांपूर्वी हरिहरेश्वर मध्ये सापडलेल्या बोटीतील शस्त्रास्त्र साठ्यामुळे कोकण आणि मुंबईमध्ये हाय अलर्ट लागू करण्यात आला आहे. त्यातच असा मेसेज मिळाल्यामुळे पोलीस अधिक सतर्क झाले आहेत . त्यासह नागरिकांनी देखील सतर्क राहण्याच्या सूचना देण्यात आल्या आहेत.
दरम्यान हा मेसेज पाकिस्तानमधून आला असल्याची प्राथमिक माहिती देखील समजते आहे . मुंबई पोलीस आयुक्त विवेक फणसळकर यांनी याप्रकरणी पत्रकार परिषद घेऊन माहिती दिली आहे . याप्रकरणी मुंबईवर 26/11 सारखा दहशतवादी हल्ला करणार अशी धमकी देणाऱ्या व्यक्ती विरोधात वरळी पोलीस स्टेशनमध्ये गुन्हा दाखल करण्यात येतो आहे . त्यानंतर या प्रकरणाचा तपास क्राईम ब्रँचकडे सोपवण्यात येईल अशी माहिती फणसळकर यांनी दिली आहे.
” मुंबईकरांच्या सुरक्षिततेला आव्हान देणारा कोणताही कॉल आम्ही दुर्लक्षित करणार नाही . तो गांभीर्यानेच घेत आहोत . दहशतवाद विरोधी पथक सोबत आम्ही वेळोवेळी माहिती शेअर करत आहोत.” असे यावेळी विवेक फणसळकर यांनी सांगितले आहे .