सातारा : राज्यात सध्या अपघाताचे (Satara Accident) प्रमाण मोठ्या प्रमाणात वाढले आहे. म्हसवड येथील सातारा-पंढरपूर महामार्गावर मायणी चौकात दुचाकीला पाठीमागून येणाऱ्या डंपरने दिलेल्या धडकेत दुचाकीस्वाराचा जागीच मृत्यू झाला तर त्याच्या पाठीमागे बसलेल्या तरुणीला आपले दोन्ही पाय गमवावे लागले आहेत. अपघात झालेले तरुण तरुणी हे सातारा येथील असल्याचे प्राथमिक तपासात समोर आले आहे.
काय घडले नेमके?
माण तालुक्यातील म्हसवड येथील मायणी चौकात सातारा- लातूर महामार्गावर डंपरने दुचाकीस्वराला चिरडल्याने त्याचा जागीच मृत्यू झाला तर त्याच्या मागे बसलेली तरुणी ही गंभीर जखमी झाली. तिला या अपघातात तिचे दोन्ही पाय गमवावे लागले. ही घटना 26 सप्टेंबर रोजी सायंकाळी पाच वाजता घटना घडली. सातारा येथील अभिषेक जाधव (वय 30) असे मृतकाचे नाव आहे, तर नेहा जयवंत सावंत (वय 27) असे जखमीचे नाव आहे.
लातूर महामार्गावर म्हसवड येथील मायणी चौकात सातारा – लातूर महामार्गावर दुचाकी (क्रमांक एमएच 50 एफ 5755) होन्डा कंपनीची युनिकॉर्न दुचाकी व नंबरप्लेट नसलेला व मुरुम भरलेला डंपर म्हसवडहुन दहिवडीकडे जात असताना मायणी चौकात अचानक डंपरने मायणीकडे जाण्यासाठी वळण घेतले. त्यामुळे दुचाकी जाधव यांच्या डोक्यावरून व नेहा सावंत यांच्या दोन्ही पायावरून डंपर गेल्याने जाधव यांचा जागीच मृत्यू झाला, तर नेहा सावंत ह्या गंभीर जखमी झाल्या. या अपघाताची माहिती मिळताच म्हसवड पोलीस स्टेशनचे सहाय्यक पोलिस निरीक्षक राजकुमार भुजबळ यांनी घटनास्थळी धाव घेऊन घटनास्थळाचा पंचनामा केला. म्हसवड पोलिस स्टेशनचे सहाय्यक पोलिस निरीक्षक राजकुमार भुजबळ या अपघाताचा पुढील तपास करत आहेत.