मुंबई – राष्ट्रवादी काँग्रेसचे नेते नबाव मलिक यांच्या न्यायालयीन कोठडीची मुदत न्यायालयाने 18 एप्रिलपर्यंत वाढवली आहे. त्यामुळे मलिक यांचा तुरुंगातील मुक्काम आणखी दोन आठवडयांनी वाढला आहे.
नवाब मलिक यांना ‘टेरर फंडिंग`च्या आरोपावरून ईडीने अटक केली आहे. मलिक हे सध्या न्यायालयीन कोठडीत आहेत.आज त्यांच्या न्यायालयीन कोठडीची मुदत संपणार होती. मात्र न्यायालयाने आणखी दोन आठवड्यासाठी न्यायालयीन कोठडीची मुदत वाढवली आहे.
गँगस्टर दाऊद इब्राहिमची बहीण हसीना पारकरला मालमत्तेसाठी मलिक यांनी पैसे दिले या आरोपावरून मलिक यांना ईडीने अटक केली आहे. मलिक यांना अटक झाल्यानंतर भाजपने त्यांच्या राजीनाम्यांची मागणी केली आहे. तर महाविकास आघाडी सरकारने मलिक यांचा राजीनामा घेणार नसल्याची भूमिका घेतली आहे.
दरम्यान, ईडीने अटक केल्याच्या विरोधात मलिक यांनी उच्च न्यायालयात धाव घेतली होती. ईडीची कारवाई चुकीची असल्याचा दावा त्यांनी केला होता. हे प्रकरण 22 वर्षांपूर्वीचे असल्याचेही त्यांनी म्हटले होते. न्यायालयाने मलिक यांची ही याचिका फेटाळून लावली होती.
मागील सुनावणीवेळी न्यायालयाने मलिक यांच्या तीन मागण्या मान्य केल्या होत्या. न्यायालयीन कोठडीत बेड, गादी आणि खुर्ची देण्याचे आदेश न्यायालयाने दिले होते. त्यापूर्वीही मलिक यांनी ईडीच्या कोठडीत असताना घरचे जेवण मिळावे, चौकशीदरम्यान आपल्या वकिलांना उपस्थित राहण्याची परवानगी मिळावी आणि रोजची औषधे घेऊ द्यावीत, अशा तीन मागण्या केल्या होत्या. या तीनही मागण्या न्यायालययाने मान्य केल्या होत्या.
