पुणे कृषी उत्पन्न बाजार समितीच्या मार्केटयार्डातील बाजार आवारात चोरट्यांनी अक्षरशः उच्छाद मांडलाय. याठिकाणी शेतमालाच्या चोरीच्या घटना सर्रास घडत असून त्याकडे मात्र बाजार समिती प्रशासनाकडून दुर्लक्ष होतंय.बाजार समितीच्या मार्केटयार्डातील मुख्य बाजार आवारात पुणे विभागासह राज्यातील विविध जिल्ह्यांसह आणि परराज्यातून शेतमालाची दररोज मोठ्या प्रमाणात आवक होते. अनेक ठिकाणी बाजार समितीसह आडत्यांनी स्वतः सीसीटीव्ही कॅमेरे बसविले आहेत. तरीही शेतमालासह कॅरेटची व शेतमालाची चोरी होत असल्याने शेतकऱ्यांसह व्यापाऱ्यांचं मोठ्या प्रमाणात नुकसान होत आहे.
मार्केटयार्डातील विविध गाळ्यांमध्ये दररोज मोठ्या प्रमाणात शेतमालाची आवक होते. अनेक गाळ्यांवर बाजार समितीसह आडत्यांनी स्वतः सीसीटिव्ही कॅमेरे बसविले आहेत. तरीही आडत्यांच्या गाळ्यांवर शेतमालासह कॅरेटची चोरी होत असल्याच्या तक्रारी आडत्यांनी केल्या आहेत.शेतमालाची चोरी होत असल्याने शेतकऱ्यांसह व्यापाऱ्यांचे नुकसान होत आहे. गेल्या काही आठवड्यांमध्ये बाजार आवारात कांदा, बटाटा, लसूण, फळ विभागात चोरीच्या घटना घडल्या आहेत.
या संदर्भात आडते असोसिएशनने बाजार समिती प्रशासनाशी संपर्क साधला असून सुद्धा प्रशासनाला तक्रारीची दखल घ्यावीशी वाटली नाही. त्यामुळे व्यापारी वर्गातून संताप व्यक्त केला. गेल्या अनेक वर्षापासून चोरीच्या घटना घडत होत्या. परंतु गेल्या काही आठवड्यांपासून सातत्याने या घटनांमध्ये वाढ झाली आहे. बाजार समिती प्रशासनाने सुरक्षारक्षक नेमले असून देखील चोऱ्या होत असल्याचे व्यापारी वर्गाने बाजार समितीने प्रशासनाच्या निदर्शनास आणून दिले आहे
