मुंबई- शिवसेना नेते संजय राऊत यांनी पत्रकार परिषद घेऊन भाजपमधील साडेतीन लोकांची नावे जाहीर करणार असल्याचे काल, सोमवारी जाहीर केले होते. आज संध्याकाळी 4 वाजता संजय राऊत शिवसेना भवनामध्ये पत्रकार परिषद घेणार आहेत. पण त्यापूर्वीच भाजपच्या नेत्यांनी दिल्लीकडे प्रयाण केल्यामुळे तर्कवितर्कांना उधाण आले आहे.
राऊत यांच्या पत्रकार परिषदेला अवघे दोन तास बाकी असतानाच भाजपचे प्रदेशाध्यक्ष चंद्रकांत पाटील अचानक दिल्लीला रवाना झाले आहेत. तर भाजपचे नेते किरीट सोमय्या हे थोड्याच वेळात दिल्लीसाठी रवाना होणार आहेत. बर्दाश्त बहोत किया अब बर्बाद करेंगे असं राऊतांनी सुनावलं होतं. त्यामुळे राऊत यांच्या पीसीपूर्वीच भाजपच्या तंबूत खळबळ उडाली आहे.
दिल्ली भेटीत चंद्रकांत पाटील आणि सोमय्या हे भाजपचे राष्ट्रीय अध्यक्ष जेपी नड्डा आणि केंद्रीय गृहमंत्री अमित शहा यांना भेटण्याची शक्यता वर्तवली जात आहे. तसेच राऊत यांनी राज्यातील किंवा केंद्रातील नेत्यांवर भ्रष्टाचाराचे आरोप केल्यास पुढे काय करायचं याचं मार्गदर्शन हे दोन्ही नेते दिल्लीतील नेत्यांकडून घेणार असल्याचं सांगितलं जात आहे. त्यामुळे पाटील आणि सोमय्या यांच्या या दिल्लीवारीमध्ये नेमके काय घडणार याकडे सर्वांचे लक्ष लागले आहे.
संजय राऊत हे दुपारी 4 वाजता पत्रकार परिषद घेणार आहेत. या पत्रकार परिषदेला शिवसेनेचे मंत्री, आमदार आणि खासदार उपस्थित राहणार आहेत. ठाणे, पुणे, नाशिक आणि औरंगाबादमधूनही शिवसेनेचे महत्त्वाचे पदाधिकारी, कार्यकर्ते शिवसेना भवना समोर दाखल झाले आहेत. सेनाभवनावर पोलिसांचा मोठा बंदोबस्त तैनात करण्यात आला आहे. सेनाभवनाला लष्करी छावणीचे स्वरूप आले आहे. संजय राऊत यांच्या पत्रकार परिषदेचे लाइव्ह टेलिकास्ट सर्वांना दिसावे यासाठी सेनाभवनाबाहेर एलईडी स्क्रीन लावण्यात आले आहेत.
