पिंपरी- पुण्यातील हिंजवडी आयटी पार्क जवळ मुळा नदी शेजारी अतिशय निर्जनस्थळी एका झाडावर एका मुलीचा मृतदेह आढळून आल्यामुळे खळबळ उडाली आहे. मारेकऱ्याने मुलीचा खून करून तिचा मृतदेह झाडाला लटकावला असल्याचे प्राथमिक तपासून समोर आले आहे. या मुलीची अद्याप ओळख पटलेली नाही.
पोलिसांनी दिलेल्या माहितीनुसार, माण गावाच्या डोंगराळ भागात सहसा कोणीही फिरकत नाही. मात्र, बुधवारी तरुणांच्या टोळके या ठिकाणी आले त्यावेळी त्यांना झाडावर मृतदेह लटकलेला असल्याचे आढळून आले. त्यांनी ही माहिती पोलिसांनी दिली. माहिती कळताच हिंजवडी पोलिसांनी घटनास्थळी धाव घेतली. या मुलीचा खून चार ते पाच आठवड्यापूर्वी करण्यात आला असावा. मृतदेह पूर्णपणे कुजलेल्या अवस्थेत होता. पोलिसांनी मृतदेह डीएनए चाचणी आणि शवविच्छेदनासाठी रुग्णालयात पाठवला.
याबाबत माहिती देताना पोलीस आयुक्त कृष्णप्रकाश म्हणाले की, बेपत्ता लोकांची माहिती घेण्याचे काम सुरु असून त्यातून या मुलीची ओळख पटू शकते. आपल्या भागात कुणी मुलगी बेपत्ता असल्यास नातेवाइकांनी पोलिसांशी संपर्क साधावा असे आवाहन पोलीस आयुक्तांनी केले.
