पुणे – यवत येथे घडलेल्या सामूहिक बलात्काराच्या घटनेतील आरोपींना बारामती जिल्हा सत्र न्यायालयाने 5 दिवसांची पोलीस कोठडी सुनावली आहे. या घटनेमुळे संपूर्ण जिल्ह्यात खळबळ उडाली होती.
बलात्काराची घटना शनिवारी (दि 29) रात्री साडेआठ ते अकराच्या सुमारास यवत जवळ एका निर्जनस्थळी घडली होती. या प्रकरणी पोलिसांनी अजय बापू चौधरी (वय 22), किरण रोहिदास चौधरी (वय 27), शंकर संपत चौधरी (वय 26, नवनाथ नाना कोकरे (वय 32) (सर्व राहणार खोर) आणि संतोष भगवान चव्हाण (वय 32 , रा. गिरीम, ता.दौंड) यांना पोलिसांनी अटक केली आहे.
काय आहे घटना ?
संबंधित पीडित महिला आपल्या पतीसोबत जेवण करण्यासाठी यवत येथील एका हॉटेलमध्ये गेली होती. पती हॉटेलमध्ये विचारपूस करण्यासाठी गेला असता, विवाहिता बाहेर उभी होती. यावेळी आरोपींनी महिलेला तिच्या भावाचा अपघात झाला आहे, असे खोटे सांगितले. त्यानंतर तिला फसवून तिला दुचाकीवर बसवून सात किलोमीटर अंतरावर नेले. त्यानंतर एका मोकळ्या जागेत तिच्यावर पाच जणांनी बलात्कार केल्याचा आरोप आहे. पीडितेने दिलेल्या फिर्यादीवरुन यवत पोलिसांनी पाच जणांना ताब्यात घेऊन अटक केली. पाचही आरोपीना बारामती जिल्हा सत्र न्यायालयाने 5 दिवसांची पोलीस कोठडी सुनावली आहे.
