पुणे- प्रेमसंबंधातून झालेल्या वादात प्रियकराने प्रेयसीचा भिंतीवर डोके आपटून खून केला. त्यानंतर चोरीचा बनाव करून प्रेयसीच्या अंगावरील दागिने,मोबाईल चोरून पळ काढला. ही घटना हडपसर पोलीस ठाण्याच्या हद्दीत घडली.
सुनीता बाळू कदम असे खून झालेल्या महिलेचे नाव असून किसन सीताराम जगताप ( वय ४६ रा नारळीचा मळा ता.पुरंदर) असे आरोपीचे नाव आहे. या प्रकरणी सुनीता हिच्या विवाहित मुलीने फिर्याद दिली आहे.
मिळालेल्या माहितीनुसार, किसन आणि सुनीता यांचे सुनीत गेल्या १० ते १२ वर्षापासून संबंध होते. सुनीता त्याला लग्नासाठी तगादा लावत होत्या. किसन याला त्याच्या मुलीच्या लग्नासाठी पैसे हवे होते. त्या पैशासाठी किसन याने सुनीताचा खून केला. आरोपी किसान याने शनिवारी (दि. ९) रात्री साडेअकरा वाजता एक कोल्डड्रिंकची बाटली घेतली. त्यात झोपेच्या गोळ्या टाकून सुनीताला पाजले. तिच्याशी गप्पा मारण्याचे नाटक केले. तिला गुंगी येताच तिचे डोके भिंतीवर आपटून तिचा खून केला. त्यानंतर सुनीताच्या अंगावरील सोन्याचे दागिने, मोबाईल एटीएम कार्ड घेऊन पळून गेला.
ही घटना सुनीता यांच्या मुलीला रविवारी सकाळी लक्षात आला. तिने त्वरित हडपसर पोलिसांना याबाबतची माहिती दिली. पोलिसांनी तपास सुरु केला. गुन्हे शाखा युनिट पाचच्या पथकाने आरोपी किसनला त्याच्या राहत्या घरातून ताब्यात घेतले. पुढील तपास सहाय्य्क पोलीस निरीक्षक विजयकुमार शिंदे करत आहेत.
