बुलढाणा : बुलढाणामध्ये (Buldhana Crime) एक धक्कादायक घटना समोर आली आहे. या घटनेमुळे (Buldhana Crime) महामंडळाचा भोंगळ कारभार पुन्हा एकदा चव्हाट्यावर आला आहे. विद्यार्थी आणि वृद्ध प्रवासी घेऊन प्रवास करत असताना अचानक स्टेरिंग रोड लॉक झाल्याने एसटी बसचा अपघात झाला आहे. सुदैवाने मोठा अनर्थ टळला आहे.
काय घडले नेमके?
बुलढाणा जिल्ह्यातून एक मोठी बातमी समोर आली आहे. आज सकाळी सवणा येथून बस क्र. एमएच 20 डी 9367 ही चिखली येथे जात होती. दरम्यान सकाळी एसटी पलटी झाली. त्या एसटीत विद्यार्थी असल्याची माहिती मिळाल्यानंतर पालकांनी आणि ग्रामस्थांनी घटनास्थळी धाव घेतली. एसटी एका खड्ड्यात पलटी झाल्यामुळे विद्यार्थ्यांना दुखापत झाली आहे. ज्या विद्यार्थ्यांना आणि प्रवाशांना किरकोळ जखम झाली आहे, त्यांच्यावर उपचार करुन घरी सोडून देण्यात आले आहे.
अपघात झालेल्या एसटीत जवळपास 25 च्या पुढे विद्यार्थी होते. हे विद्यार्थी खाजगी शिकवणी करता निघाले होते. जखमी झालेल्या सगळ्या विद्यार्थ्यांना जवळच्या रुग्णालयात दाखल करण्यात आले आहे. या अपघातात एसटीचा चालक सुध्दा गंभीर जखमी झाला असून एसटीचं स्टेरिंग लॉक झाल्यामुळे हा अपघात झाल्याचे चालकाने सांगितले आहे.
