ठाणे : मुंब्रा-बायपास रोडवर एका धावत्या कारला आग लागल्याची घटना (Thane Crime) समोर आली आहे. या घटनेमुळे मोठी खळबळ उडाली आहे. रविवारी रात्री उशीरा हा अपघात घडला. मात्र सुदैवाने यामध्ये कोणतीही जीवितहानी झालेली नाही. कारमधील सर्व प्रवाशांना सुखरूपरित्या बाहेर काढण्यात आले आहे यामुळे मोठी जीवितहानी टळली आहे.
काय घडले नेमके?
रविवारी रात्रीच्या सुमारास कुटुंबातील काही मंडळी पनवेल येथून ठाण्याच्या दिशेने कारमधून निघाली होती. मात्र मुंब्रा-बायपास रोडवर कार आल्यावर अचानक कारने पेट घेतला. त्यावेळी कारमध्ये दोन पुरूष, दोन महिला आणि तीन लहान मुले यांचा समावेश होता. मात्र ते सर्वजण सुखरूपरित्या कारमधून बाहेर आले.
या घटनेची माहिती मिळताच अग्निशमन दलाच्या जवानांनी तातडीने घटनास्थळी धाव घेतली. अथक प्रयत्नांनंतर बऱ्याच काळाने कारला लागलेली आग विझवण्यात अग्निशमन दलाच्या जवानांना यश आले. मात्र ही आग नेमकी का, कशी लागली, त्याचे कारण अद्याप समजू शकलेले नाही.
