परभणी : परभणी जिल्ह्यातून एक धक्कादायक बातमी समोर आली आहे. यामध्ये सेप्टिक टॅंकची (septic tank) सफाई करताना पाच कामगारांना आपला जीव गमवावा लागला आहे. हि दुर्दैवी घटना परभणी जिल्ह्यातील सोनपेठ तालुक्यातील भाऊचा तांडा शिवारामध्ये घडली आहे. हे कामगार रात्रीच्या सुमारास सेप्टिक टॅंक स्वछ करण्यासाठी उतरले होते तेव्हा ही घटना घडली आहे.
या घटनेमुळे भाऊचा तांडा शिवारामध्ये मोठ्या प्रमाणात शोककळा पसरली आहे. शेख सादेक (वय 55), शेख जुनेद (वय 32) शेख शारोक (वय 28), शेख नवीद (वय 28), शेख फेरोज (वय 29) अशी या दुर्दैवी घटनेमध्ये मृत पावलेल्या व्यक्तींची नावे आहेत. मृत व्यक्तींचे मृतदेह उत्तरीय तपासणीसाठी परभणी जिल्हा सामान्य रुग्णालयात नेण्यात आले आहेत.
काय घडले नेमके?
परभणी जिल्ह्यातील सोनपेठ तालुक्यातील भाऊचा तांडा या शिवारातील एका शेतातील घराच्या सेफ्टीक टॅंक स्वछ करण्याचे कंत्राट परभणी आणि सोनपेठ मधील काही कामगारांनी घेतले होते. यामुळे काल रात्री शेख सादेक, शेख जुनेद, शेख शाहरूख, शेख नवीद, शेख फेरोज, शेख साबेर हे सहा जण सेफ्टीक टॅंक स्वछ करत होते. तसेच आणखी एक त्यांचा सहकारी टॅंकवरती होता.हे स्वछतेचे काम सुरु असताना ही घटना घडली.
धक्कादायक! नातेवाईकाच्या दहाव्यासाठी निघालेल्या दाम्पत्याचा अपघाती मृत्यू
हे कामगार नेमके गुदमरले कि त्यांचा विजेचा शॉक लागून मृत्यू झाला हे मात्र अद्याप समजू शकलेले नाही. मात्र या अपघातात शेख सादेक, शेख जुनेद,शेख शाहरूख,शेख नवीद,शेख फेरोज यांचा जागीच मृत्यू झाला तर शेख साबेर यांना अत्यवस्थ अवस्थेमध्ये परळी येथील रुग्णालयात उपचारासाठी दाखल करण्यात आले. या घटनेमुळे परिसरात मोठी खळबळ उडाली आहे.
