नवी मुंबई : शहरात अपघातांच्या प्रमाणात दिवसेंदिवस वाढ होताना दिसत आहे. त्यात अपघात झाला (Navi Mumbai News) तर अनेक वेळा जखमी व्यक्तींना मदत करायचे सोडून अनेक जण पळ काढतात तर काहीजण एकमेकांवर हात उचलतात. हातात जे असेल ते फेकून मारतात. अशीच एक घटना वाशी परिसरामध्ये घडली. ह्या घटनेमध्ये बस आणि कारची धडक झाली. ह्या धडकेनंतर कारचालकाने रौद्र रूप धारण केले.
प्रवाशांची बस जोरदार कारला धडकल्यामुळे कार चालकाने थेट तलवार काढली. या घटनेचे भयानक रूप प्रवाशांना प्रवास करताना पाहायला मिळाले. या घटनेमध्ये नवी मुंबई महानगर पालिकेच्या बसची कारला जोरदार धडक बसली. ह्या धडकेमध्ये कोणालाही दुखापत झाली नसून कारचे मोठ्या प्रमाणात नुकसान झाले आहे. धडक होताच कारमधील चालक बाहेर येऊन बस चालकाला जोरजोरात शिवीगाळ करू लागला. त्यात तो शिव्या देऊनच थांबला नाही तर त्याने हातात तलवार घेऊन थेट बसवर सपासप वार करत राहिला. त्याने थेट चालकाला मारण्याची धमकी देखील दिली आहे.
ही सर्व घटना रात्रीच्या वेळी 10 ते 11 च्या दरम्यान घडली आहे. ह्या घटनेमध्ये कोणालाही दुखापत झाली नसून गाडीचे मोठ्या प्रमाणात नुकसान झाले आहे. ह्या घटनेसंदर्भातील आरोपीबाबत वाशी पोलीस ठाण्यात गुन्हा दाखल करण्यात आला आहे. सनी लांबा असे तलवार हातात घेऊन दहशत माजवणाऱ्या आरोपीचे नाव आहे. हा गुन्हा दाखल झाल्यानंतर आरोपीकडे तलवार कुठून आली, याचा तपास पोलीस करत आहेत. अपघातग्रस्त बस ही उरणवरून कोपर खैरणेला जाणारी होती. या घटनेमुळे परिसरात मोठी खळबळ उडाली आहे. वाशी पोलीस या घटनेचा पुढील तपास करत आहेत.
