यवतमाळ : यवतमाळमध्ये एक मन हेलावून टाकणारी घटना घडली आहे. यामध्ये चिमुकल्या मुलासह आईने गळफास लावून आत्महत्या केली आहे. ही घटना यवतमाळ शहरातील अशोक नगर परिसरात घडली आहे. रेश्मा वंडकर (38) (Reshma Vandkar) आणि पूर्वेश वंडकर (8) (Purvesh Vandkar) (दोघेही रा. सिंहगड रोड कोल्हेवाडी, पुणे, हल्ली मुक्काम अंबिका नगर, यवतमाळ) असे मृत मायलेकाचे नाव आहे. या प्रकरणी रितेश देशभ्रतार (Ritesh Deshbhartar) यांनी पोलिसांत फिर्याद दाखल केली आहे.
काय आहे संपूर्ण प्रकरण?
बहिणीचे 14 मे रोजी लग्न असल्याने मोठी ताई रेश्मा वंडकर ही तिचा 8 वर्षीय मुलगा पूर्वेश याच्यासह एक महिन्यापूर्वी यवतमाळ येथे आली होती. रेश्मा हिचा मुलगा गतिमंद असल्याने, उपचार करण्याच्या उद्देशाने तिने मुलासह यवतमाळला राहण्याचा निर्णय घेतला. त्यामुळे ती शहरातील अशोक नगर येथे भाड्याने खोली घेऊन राहत होती. यादरम्यान बहिणीचा विवाह झाल्यानंतर तिने शनिवारी दुपारच्या सुमारास अशोक नगर येथील आईच्या घरी कुणी नसल्याचे बघून 8 वर्षीय चिमुकल्यासह गळफास लावून आत्महत्या केली.
या घटनेमुळे परिसरात मोठी खळबळ उडाली आहे. या घटनेची माहिती मिळताच महिला पोलिस उपनिरीक्षक वानखेडे यांनी कर्मचार्‍यांसह घटनास्थळी धाव घेतली. त्यानंतर घटनास्थळाचा पंचनामा करून नागरिकांच्या मदतीने मृतदेह खाली उतरून जिल्हा शासकीय रुग्णालयात उत्तरीय तपासणीसाठी पाठवण्यात आला आहे. या प्रकरणाचा पुढील तपास प्रभारी ठाणेदार जनार्दन खंडेराव यांच्या मार्गदर्शनाखाली शहर पोलिस करीत आहे.
