दिवाळीमध्ये गोड, तिखट फराळाचा आस्वाद घेताना त्यामध्ये शेव तर असायलाच हवी. या शेवेमध्ये देखील अनेकांचे आवडीचे प्रकार देखील असतात. जसे की जाड शेव, बारीक शेव, अगदी बारीक शेव… दिवाळीमध्ये तर हमखास शेव बनवली जातेच, पण अगदी वर्षभरामध्ये सुद्धा भाजी, पोहे उपमा यावर देखील शेव घालून बरेच जण खाणं पसंत करतात. चला तर मग आज पाहूयात अगदी सोप्या पद्धतीने बनवता येईल अशी शेव रेसिपी…
साहित्य : डाळीचे पीठ, मीठ, ओवा पूड, हिंग, तिखट, तळणीसाठी तेल
कृती : सर्वप्रथम डाळीचे पीठ बारीक चाळणीने चांगले चाळून घ्या. यामध्ये मीठ आणि तिखट चवीनुसार घालावे. एक चिमूट हिंग घालून यामध्ये एक मोठा चमचा कडक गरम केलेले तेलाचे मोहन घालावे. त्यानंतर हे पीठ घट्ट भिजवायचे आहे. या अंदाजाने गरजेनुसार पाणी घालून घट्ट गोळा तयार करून घ्यावा. एकीकडे आता गॅसवर कढई ठेवून त्यामध्ये अर्धी कढईभर तेल घाला आणि ते तापू द्या.
आता तुम्हाला ज्या आकाराची शेव बनवायची आहे त्या आकाराचा साचा सो-यामध्ये लावा. सोऱ्याला आत मधून तेल लावून घ्या आणि हा पिठाचा गोळा त्यामध्ये घालावा. आता गॅस मोठाच राहू द्या. कडकडीत तेलामध्येच शेव तळायची आहे. त्यासह सर्वात महत्त्वाचे म्हणजे एकदा शेवेचा एक घाणा घालताना तो जमेल तितक्या वेगाने झटपट गोलाकार घालावा.
शेवेचा रंग हलका तांबूस होण्यास सुरुवात झाली की, लगेचच झाऱ्याने तो उलटा करून भाजून घ्या. दोन्हीही बाजूने खमंग तेलात तळल्यानंतर ही शेव व्यवस्थित तेलातून निथळून बाहेर काढून ठेवा. खमंग अशी कुरकुरीत शेव तयार आहे.
तुम्ही जर जाड साचा लावून शेवेचा घाणा घेणार असाल तर थर बारीक ठेवा. म्हणजे ती शेव आतपर्यंत व्यवस्थित तळली जाईल. जाड शेवेचा उपयोग शेव भाजी करण्यासाठी करता येऊ शकतो.
सामान्यतः मध्यम असणारा साचा लावून दिवाळीसाठी सेवेचा घाणा घेऊ शकता.
