पुण्यातील वानवडी फातिमानगर परिसरात मसाज पार्लरच्या नावाखाली सुरू असलेल्या वेश्या व्यवसायावर गुन्हे शाखेच्या सामाजिक सुरक्षा विभागाने छापा टाकला. या कारवाईत पोलिसांनी पाच तरुणींची सुटका केली तर एकास अटक केली आहे.
श्रीधर मोहन साळुंखे (४२, रा. कसबा पेठ) असे अटक केलेल्या मसाज सेंटरच्या मालकाचे नाव आहे.
वानवडीमधील फातिमानगर परिसरात क्लिओज स्पा अ‍ॅण्ड सलून येथे मसाज पार्लरच्या नावाखाली वेश्याव्यवसाय करण्यात येत असल्याची माहिती सामाजिक सुरक्षा विभागाला मिळाली. पोलिसांच्या पथकाने मसाज पार्लरवर छापा टाकला. मसाज पार्लरमधून पाच तरुणींना ताब्यात घेण्यात आले. तरुणींना वेश्या व्यवसायास प्रवृत्त केल्याप्रकरणी श्रीधर साळुंखे याच्याविरुद्ध वानवडी पोलीस ठाण्यात गुन्हा दाखल करण्यात आला आहे.
गुन्हे शाखेचे अतिरिक्त पोलीस आयुक्त रामनाथ पोकळे, उपायुक्त अमोल झेंडे यांच्या मार्गदर्शनाखाली सामाजिक सुरक्षा विभागाचे पोलीस निरीक्षक भरत जाधव यांच्या पथकाने ही कारवाई केली.
