DHFL Scam : वाधवान बंधुंवर ईडीची मोठी कारवाई; तब्बल ‘इतक्या’ कोटींची मालमत्ता केली जप्त

मुंबई : DHFL घोटाळा प्रकरणी (DHFL Scam) वाधवान बंधुंवर ईडीकडून मोठी कारवाई करण्यात आली आहे. ED ने वाधवान यांची हिऱ्यांचे दागिने आणि फ्लॅटसह 70 कोटींहून अधिकची मालमत्ता जप्त केली आहे. रात्री उशीरा ही कारवाई करण्यात आली. जप्त केलेल्या मालमत्तेत 28.58 कोटी रुपयांची पेंटिंग आणि शिल्पे, 5 कोटी रुपयांची घड्याळे, 10.71 कोटी रुपयांचे हिऱ्यांचे दागिने, 9 कोटी रुपयांच्या हेलिकॉप्टरमधील 20 टक्के स्टेक आणि वांद्रे येथील 17.10 कोटी रुपयांच्या 2 फ्लॅटचा समावेश आहे. अशी माहिती ED कडून देण्यात आली आहे.

जप्त केलेल्या मालमत्तांची एकूण किंमत 70.39 कोटी रुपये आहे. डीएचएफएलचे संचालक कपिल वाधवान आणि धीरज वाधवन आणि इतर आरोपींनी युनियन बँक ऑफ इंडिया (यूबीआय) च्या नेतृत्वाखालील बँकांच्या कन्सोर्टियमची फसवणूक करण्याचा गुन्हेगारी कट रचला. कथित कटाचा एक भाग म्हणून, कपिल वाधवन आणि इतरांनी बँकांच्या एका गटाला 42,871.42 कोटी रुपयांची मोठी कर्जे मंजूर करण्यास प्रवृत्त केल्याचे ED कडून सांगण्यात आले आहे.

‘आरोपींनी डीएचएफएलच्या खात्यांच्या पुस्तकात फेरफार करून या निधीच्या महत्त्वपूर्ण भागाचा अपहार केला आणि त्याचा गैरवापर केला आणि या कन्सोर्टियम बँकांच्या कायदेशीर थकबाकीची परतफेड करण्यात चूक केली. यामुळे बँकांचे मोठे नुकसान झाले. यामुळे कंसोर्टियम कर्जदारांना 34,615 कोटी रुपयांचे नुकसान झाले होते.