वाढत्या डिजिटल उपयोगामुळे फसवणूकीचे प्रकारही तितकेच वाढले आहेत. हॅकर आता प्राप्तीकर खात्याच्या नावावर रिफंडचा खोटा एसएमएस किंवा मेल पाठवून ग्राहकांच्या खात्यातून पैसे काढून घेत आहेत. जर आपल्यालाही प्राप्तीकराशी निगडीत कोणताही संदेश येत असेल तर सावधगिरी बाळगा. कारण कोणताही मेसेज आपले खाते काही मिनिटात रिकामे करु शकतो. प्राप्तीकर विभागाकडून नेहमीच यासंदर्भातील सूचना ग्राहकांना दिली जाते. एका खोट्या संदेशाच्या माध्यमातून टॅक्सपेअरर्सला अडवले जाते आणि त्याचे खाते हॅक केले जाते. म्हणूनच अशा स्थितीत कोणत्याही मेलला किंवा मेसेजला न वाचता उत्तर देणे धोकादायक ठरु शकते.
आयटीआरचा भरणा सार्वजनिक नेटकॅफेवर भरण्याचे टाळायला हवे. तसेच खात्रीशीर कर सल्लागाराकडून किंवा स्वत: आयटीआर भरावे. एवढेच नाही तर आपल्या मेल आयडीवर आयटीआर भरण्यासाठी मदत करणारे फिशिंग मेल येत असतात. त्याकडे दुर्लक्ष करुन बँकेच्या संकेतस्थळावर किंवा प्राप्तीकर खात्याच्या मेल आयडीवरूनच आयटीआर भरावा. जेणेकरून भविष्यातील फसवणूक टाळली जाईल.
कोणत्याही ग्राहकाने आपले खाते सुरक्षित ठेवण्यासाठी आपला पिन, ओटीपी, क्रेडिट कार्ड, डेबिट कार्डचे डिटेल्स कोणाबरोबरही शेअर करु नये. हे सर्व बनावट मेसेज असतात. प्रकरण गंभीर झाल्यास आरबीआयच्या टोल फ्री क्रमांकाला माहिती देणे गरजेचे आहे. किंवा प्राप्तीकर खाते, सायबर सेलकडेही तक्रार करावी.
प्राप्तीकर विभागाकडून मागणी नाही: करदात्याकडून कोणत्याही प्रकारचे ओटीपी, पीन, पासवर्डची मागणी प्राप्तिकर विभागाकडून केली जात नाही. त्याचबरोबर टॅक्स रिफंडसाठी खात्याचे विवरण देण्याची गरजही आयटीला भासत नाही. त्यामुळे कोणत्याही प्रकारच्या मेसेजकडे लक्ष देऊ नये. प्राप्तीकर खात्याकडे करदात्याची कुंडली असताना पुन्हा ती मागवण्याचा प्रश्नच उदभवत नाही.
फिशिंग मेलने फसवणूक :
ग्राहकांची फसवणूक ही लिंक असणार्‍या फिशिंग इ-मेल किंवा संदेशच्या माध्यमातूनही होते. अर्थात त्याची ओळख पटवणे सोपे आहे. अशा बनावट मेलकडे काळजीपूर्वक पाहणे गरजेचे आहे. मेल आयडीचे स्पेलिंग चुकीचे असू शकते किंवा खात्याशी मिळतेजुळते पर्यायी नाव असू शकते.
मेल आल्यावर काय करावे: अशा प्रकारचा मेल आल्यास आणि त्यास अ‍ॅटेचमेंट असेल तर ते सुरू करण्याचा प्रयत्न करु नये. जर आपण चुकून क्लिक केल्यास त्यात कोणत्याही प्रकारच्या खात्याचे विवरण, क्रेडिट कार्ड, डेबिट कार्ड आदी कोणतीही माहिती भरु नये.
