मुंबई : तुम्ही जर बँकमध्ये पैसे जमा करून ठेवत असाल तर ही बातमी तुमच्यासाठी आहे. सध्या बँकेच्या बाबतीत एक धक्कादायक माहिती समोर आली आहे. SBI आणि आणखी 5 बँकांना एका कंपनीने कोट्यवधी रुपयांना गंडा (Bank Fraud)घातला आहे. या घटनेमुळे मोठी खळबळ उडाली आहे. या प्रकरणी CBI ने कंपनीसह सात जणांविरोधात गुन्हा (Crime) दाखल केला आहे.
प्रकरण नेमके काय आहे ?
रायगडमधील (Raigad) लोहा इस्पात लिमिटेड कंपनीसोबत (Loha Ispat Limited Company) सात जणांविरोधात CBI कडून कठोर कारवाई करण्यात आली आहे. या कंपनीने SBI सोबत आणखी 5 बँकांना 1017.93 कोटी रुपयांचा मोठा गंडा घातला आहे. यामध्ये SBI सह बँक ऑफ इंडिया, कॅनरा बँक, इंडियन ओव्हरसीज बँक, पंजाब नॅशनल बँक आणि बँक ऑफ महाराष्ट्र या बँकांचा समावेश आहे.
आरोपींनी 2012 ते 2017 या कालावधीमध्ये वेगवेगळ्या बँकांकडून 812.07 कोटींचं वर्किंग कॅपिटल, मुदत कर्ज घेतली होती. आता हे कर्ज बुडवल्याचा आरोप त्यांच्यावर केला जात आहे. स्टेट बँक ऑफ इंडियाने ( SBI) याबाबतची तक्रार दाखल केल्यामुळे हे सगळे प्रकरण समोर आले आहे. या प्रकरणी लोहा इस्पात कंपनीचे अध्यक्ष आणि व्यवस्थापकीय संचालक राजेश पोद्दार, संचालक संजय बन्सल, हमीदार राजेश अगरवाल, अंजू पोद्दार आणि मनीष गर्ग यांच्याविरोधात गुन्हा दाखल करण्यात आला आहे. यामध्ये आणखी कोणाचा समावेश आहे का याचा तपास CBI कडून सुरु आहे.
