अहमदनगर : अहमदनगरमध्ये (Ahmadnagar News) पोलिसी पेशाला काळिमा फासणारी घटना घडली आहे. यामध्ये जमीन खरेदीत फसवणूक झाल्याने तक्रार करण्यास गेलेल्या महिलेसोबत संतापजनक कृत्य (Ahmadnagar News) केले आहे. पीडीत महिलेने राहुरी पोलिसात दिलेल्या फिर्यादीवरून हा गुन्हा दाखल करण्यात आला आहे. या घटनेने राहुरी परिसरात तसेच संपूर्ण पोलीस दलात खळबळ उडाली आहे.
महिलेने काय म्हंटले फिर्यादीत?
देवळाली प्रवरा येथील एका व्यक्तीने जमीन खरेदीत माझी फसवणूक केली होती. याबाबत तक्रार अर्ज देण्यासाठी मी देवळाली प्रवरा पोलीस दूरक्षेत्र येथे गेले. तेव्हा तेथे मला एक अनोळखी इसम भेटला. त्यास मी तक्रार अर्जाबाबत सांगितले तेव्हा त्याने मला एक मोबाइल नंबर दिला व म्हणाला की, हे राहुरी पोलीस स्टेशनचे साहेब आहेत. त्यांना तुम्ही फोन करा ते तुमची तक्रार घेतील, असे सांगितल्याने मी माझ्या मोबाइलवरून फोन लावून माझ्या तक्रार अर्जाबाबत त्यांना सांगितले. त्यानंतर त्यांनी मला संगितले की, दोन दिवसानंतर माझ्या ऑफिसमध्ये या. मी दोन दिवसानंतर पोलीस स्टेशनला येणार आहे. त्यानंतर ७ जून रोजी मी राहुरी पोलीस स्टेशनला आले तेव्हा मला समजले की, राहुरी पोलीस स्टेशनचे साहेब निवृत्त झालेले आहे. त्यामुळे मी नाऱ्हेडा साहेबांच्या केबिनमध्ये माझी तक्रार सांगण्यासाठी गेले. त्यांना मी हकिगत सांगितली असता ते मला म्हणाले की, तुम्हाला पती नाही का? तुम्ही एकट्याच आलेल्या आहात का? तुमच्यासोबत कोणी नाही आले का? कास्ट कुठली आहे? असे प्रश्न मला विचारले. त्यानंतर म्हणाले की, तुमचे काम मी करून दिल्यास यामध्ये माझा काय फायदा आहे? त्यावर मी त्यांना म्हणाले की, मी तुम्हाला 50 हजार रुपये देईल. नंतर ते मला म्हणाले की, पैशाव्यतिरिक्त माझा काय फायदा होईल? त्यावेळी मी म्हणाले की, आणखी पैसे पाहिजे असेल तर देईल. मात्र तेव्हा ते मला म्हणाले की, मला पैसे नाही पाहिजेत. मला काय पाहिजे आहे ते समजून घ्या तुम्ही.
यानंतर 8 दिवसांनी नाऱ्हेडा यांना फोन करून मी माझ्या तक्रार अर्जाबाबत विचारपूस केली असता त्यांनी सांगितले की, मला फोन करायचा नाही. तुमचे काय काम आहे ते माझ्या ऑफिसमध्ये येऊन मला सांगायचे. त्यानंतर मी अर्जाबाबत चौकशी करण्यासाठी पोलीस स्टेशनसमोर उभी असताना नार्हेडा यांनी त्यांच्या व्हॉट्सअ‍ॅपवरुन मला तू खुप छान दिसते, असा मेसेज केला. यानंतर त्यांनी मला धमकी देऊन रूमवर नेत माझ्यासोबत जबरदस्तीने शारीरिक संबंध प्रस्थापित केले, असा आरोप पीडित महिलेकडून करण्यात आला आहे. संबंधित पीडित महिलेच्या फिर्यादीवरून राहुरी पोलीस ठाण्यात पोलीस उपनिरीक्षक सज्जनकुमार नार्हेडा याच्याविरुद्ध बलात्काराचा गुन्हा दाखल करण्यात आला असून पोलीस निरीक्षक धनंजय जाधव यांच्या मार्गदर्शनाखाली या प्रकरणाचा पुढील तपास सुरु आहे.
