अकोला : महाराष्ट्र राज्य माध्यमिक आणि उच्च माध्यमिक शिक्षण मंडळाच्या वतीने घेण्यात येणाऱ्या बारावीच्या परीक्षेला बुधवारपासून (Akola News ) सुरुवात झाली. या परीक्षेमधील गैरप्रकार टाळ्यासाठी शिक्षण विभागाने सर्वत्र चोख बंदोबस्त करून कॉपीमुक्त परीक्षा घेण्यासाठी सर्व उपाययोजना केल्या. मात्र तरीदेखील काही कॉपी बहाद्दरांनी नवीन आयडिया शोधून कॉपी केल्याचे समोर आले आहे. असाच एक कॉपीचा धक्कादायक प्रकार अकोला जिल्ह्यातील पातुर शहरातल्या शाहबाबू उर्दू हायस्कूल या १२ वीच्या परीक्षा केंद्रावर घडला.
काय घडले नेमके?
बहिणीसाठी भाऊ कायपण करायला तयार असतो. याचाच प्रत्यय तुम्हाला या प्रकरणातून येईल. यात चक्क भावाने पोलिसांचा गणवेश धारण करून या केंद्रावर रुबाबाने आपल्या बहिणीला कॉपी पुरविण्याचा प्रयत्न केला. मात्र त्याचे हे बिंग फुटले आणि आणि हा सर्व प्रकार उघडकीस आला. अनुपम मदन खंडारे (24, रा. पांगरा बंदी) असं या तोतया पोलिसांचं नाव आहे.
असा उघडकीस आला बनाव?
पातुरच्या शाहाबाबु हायस्कुलच्या परीक्षा केंद्रावर एका परीक्षार्थींचा भाऊ अनुपम खंडारे हा कॉपी पुरवण्यासाठी थेट पोलीसाचा गणवेश परिधान करून तोतया पोलीस बनला. त्यानंतर बहिणीला कॉपी देण्यासाठी परीक्षा केंद्रावर इकडे तिकडे फिरू लागला. तेवढ्यात पातूर पोलीस स्टेशनचे पोलीस निरीक्षक किशोर शेळके हे आपल्या ताफ्यासह या परीक्षा सेंटरवर बंदोबस्तासाठी पोहचले असता, तोतया पोलिसाची एकच तारांबळ उडाली. वरिष्ठ अधिकाऱ्यांना पाहता तोतया अनुपमनं त्यांना सॅल्यूट ठोकला. परंतु पोलिसांनी त्याचा सॅल्यूट पाहून त्याच्यावर संशय आला. तसेच त्याने घातलेला गणवेश, त्यावरील नेम प्लेट चुकीची असल्याने हा धक्कादायक प्रकार समोर आला.
आरोपी भावाविरोधात गुन्हा दाखल
पातूर पोलीस स्टेशनचे पोलीस निरीक्षक किशोर शेळके यांनी तोतया पोलीस असलेल्या अनुपमची अधिक विचारपुस केली असता, हा सर्व प्रकार पोलिसांच्या लक्षात आला. पोलिसांनी त्याची चौकशी आणि झडती घेतली असता त्याच्या जवळ इंग्रजी विषयाची कॉपी आढळून आली. यानंतर पातूर पोलिसांनी अनुपम विरोधात 417, 419, 170, 171 आणि अधिनियम 1982 चे कलम 7 नुसार गुन्हा दाखल करून पुढील तपासाला सुरुवात केली आहे.
नवीन अपडेट मिळवण्यासाठी आमचे WhatsApp Group, facebook page ,Instagram, WhatsApp Channel,Twitter जॉइन करा.
Viral Video : नागपूरमधील माजी नगरसेवकावर जीवघेणा हल्ला; घटना CCTV मध्ये कैद
Resident Doctor : प्रलंबित मागण्यांसाठी आजपासून पुन्हा राज्यभरातील निवासी डॉक्टरांचा संप
