नाशिक : काही लोक परीक्षेत कॉपी करण्यासाठी वेगवेगळ्या पद्धती वापरत असतात. नाशिकमध्ये तर एका पठ्ठ्याने मुन्नाभाई एमबीबीएस या चित्रपटात मुन्नाभाई जशी कॉपी करतो तशी कॉपी केली आहे. हा सगळा प्रकार नाशिकमध्ये घडला आहे. पिंपरी चिंचवड महानगरपालिकेच्या लिपिक आणि इतर पदांच्या भरतीसाठी नाशिकमध्ये रविवारी घेतलेल्या परीक्षेदरम्यान ही घटना घडली आहे. या आरोपी तरुणाला पोलिसांनी अटक केली आहे.
बटन कॅमेरा आणि ब्लूटूथ या तंत्रज्ञानाच्या साह्याने ही कॉपी करण्यात आली. या प्रकरणी परीक्षा देणारा मूळ उमेदवार, त्याच्या जागी परीक्षा देणाऱ्या डमी परीक्षार्थी आणि उत्तर पुरवणारा अशा तीन संशयिताविरोधात नाशिकच्या उपनगर पोलीस ठाण्यात गुन्हा दाखल करण्यात आला आहे. हे तिघेही छत्रपती संभाजी नगर जिल्ह्यातील रहिवाशी आहेत. नाशिक रोड येथील आर्टिलरी सेंटर भागातील फ्युचर टेक सोल्युशन केंद्रावर ही परीक्षा घेण्यात आली होती.
अर्जुन मेहेर या परीक्षार्थीच्या जागेवर राहुल नागलोथ या डमी उमेदवाराने परीक्षा दिली, त्याने बटन कॅमेरा आणि ब्लूटूथ च्या साह्याने प्रश्नपत्रिका फोटो बाहेर पाठवला आणि केंद्राबाहेर उभ्या असलेल्या अर्जुन राजपूत याने प्रश्नांची माहिती दिली. पोलिसांनी या प्रकरणी राजपूत आणि नागलोथ या दोघांना ताब्यात घेऊन पुढील तपासाला सुरूवात केली आहे.
