उन्हाळ्याचे दिवस आले की आगीच्या घटना वाढतात, असे मागील काही वर्षांत दिसून आले आहे. अर्थात, आगीची घटना कधीही आणि केव्हाही घडू शकते. ही घटना हलगर्जीपणामुळे किंवा एखाद्याच्या चेष्टामस्करीतून देखील घडू शकते. अशा स्थितीत आग लागण्याची शक्यता नाकारता येत नाही. दुर्देवाने अशी घटना घडली तर घरातील सामानाची मोठी हानी होते. गेल्या काही वर्षात शहरातील घरांना आग लागण्याचे प्रमाण तुलनेने वाढले आहे.
आगीमुळे मोठ्या प्रमाणात आर्थिक नुकसान होतेच त्याचबरोबर मानसिक आघात देखील होतो. तो पचवणे कठिण जाते. मात्र घराचा विमा काढून आगीमुळे होणार्‍या नुकसानीपासून बचाव केला जावू शकतो आणि आर्थिक संरक्षणही मिळवू शकतो.
फायर इन्शुरन्सतंर्गत आग लागल्यावर इमारत आणि इमारतीतील सामानाची होणारी हानी भरून काढण्याची हमी मिळते. घराचा विमा उतरवताना घरातील संपूर्ण सामानाची माहिती सादर करावी लागते. या विमा पॉलिसीतंर्गत अतिरिक्त लाभ देखील विमाधारकाला मिळू शकतात. आजकाल बहुतांश विमा कंपन्यांचे फायर इन्शूरन्स बाजारात उपलब्ध असून अधिकाधिक लाभ आणि सवलत देणार्‍या विमा पॉलिसीची निवड आपण करावी. साधारणपणे गृहकर्जाच्या वेळी बँक किंवा वित्तिय ंसंस्थेमार्फत फायर विमा उतरवला जातो. जेणेकरून ग्राहकावर दुर्देवी घटनांचा परिणाम होणार नाही अणि कर्जाची जोखीम कमी राहिल.
फायर इन्शुरन्समध्ये कव्हर होणार्‍या बाबी :
- केवळ इमारतच नाही तर इमारतीतील वस्तू, सॅनेटरी फिटिंग्ज आदींची नुकसान भरपाई करून दिली जाते.
- गॅरेज, घरात झाकून ठेवलेल्या वस्तू, कॅनोपी, चारही भिंतींना विमा कवच दिलेले असते.
- खासगी रस्ता, स्विमिंग पूल आणि कारंजे यांना देखील विमा संरक्षण दिले जाते.
- अर्थात घराच्या पायाला आगीमुळे नुकसान होण्याची शक्यता कमीच असते. मात्र भूकंपामुळे घराचा पाया खचू शकतो.
- विविध प्रकारच्या फायर इन्शूरन्स पॉलिसी या गरजेनुसार निवड करू शकतो.
- स्पेसिफिक पॉलिसी: या पॉलिसीनुसार विमा कंपनी मालमत्तेला हानी पोचल्यानंतर एक रक्कमी पैसे देते. ही रक्कम मालमत्तेच्या वास्तविक मूल्यापेक्षा कमी असू शकते. या योजनेतंर्गत पॉलिसीधारकारला नुकसानीचा एक भाग सहन करावा लागतो. कारण मालमत्तेचे वास्तविक मूल्य हे अगोदरच निश्चित केलेले नसते.
- कॅम्प्रिहँसिव्ह पॉलिसी: या पॉलिसीला आपण ऑल इन वन असेही म्हणू शकतो. कारण ही पॉलिसी केवळ आगच नाही तर दरोडो, चोरी आदी कारणांमुळे झालेली हानी तसेच थर्ड पार्टी रिस्क कव्हर देखील करते. या दुर्घटनेमुळे जर विमाधारकाच्या उत्पन्नावर काही परिणाम झाला असेल तर त्याची भरपाई पॉलिसी करून देते. जोपर्यंत तो नवीन व्यवसाय सुरू करत नाही, तोपर्यंत पॉलिसीच्या नियमानुसार रक्कम दिली जाते.
- व्हॅल्यूड पॉलिसी: मालमत्तेचे आकलन अगोदरच केले जाते आणि संभाव्य वास्तविक नुकसानीवर लक्ष दिले जात नाही. या पॉलिसीत झालेल्या करारानुसार जर एखाद्या मालमत्तेचे नुकसान झाले असेल तर अगोदर निश्चित केलेली रक्कम पॉलिसीधारकाला प्रदान केली जाते. यावेळी रक्कम देताना नुकसानीची तीव्रता पाहिली जात नाही.
- फ्लोटिंग पॉलिसी: या प्रकारच्या पॉलिसीनुसार पॉलिसीधारकाला विविध मालमत्तेला एकच करार आणि हप्त्यात कव्हर केले जाते. ही पॉलिसी दोन वेगळ्या स्टोअर्समध्ये असलेल्या मालाला विमा कवच देण्याचे काम करते.
- रिप्लेसमेंट किंवा रि-इन्स्टेंटमेंट पॉलिसी: या पॉलिसीनुसार विमा कंपनी पॉलिसीधारकाला एक रक्कम देण्याऐवजी नुकसानग्रस्त मालमत्तेचा पुनर्विकास करण्याचे काम केले जाते. याप्रकारे खराब झालेल्या सामानाच्या ठिकाणी नवीन सामान दिले जाते.
