मुंबई-पुणे राष्ट्रीय महामार्गावर शिलाटणे गावाजवळ कार आणि कंटेनर यांच्यात भीषण अपघात झाला. या अपघातात कारमधील पाच जणांचा जागीच मृत्यू झाला.
पुण्याच्या दिशेनं भरधाव वेगात जाणाऱ्या कारवरील चालकाचा ताबा सुटल्यानंतर कार्ला फाटा सोडल्यानंतर ही कार दुभाजक ओलांडून मुंबईच्या दिशेनं जाणार्‍या कंटेनरखाली घुसली. या भीषण अपघातात कारमधील सर्व प्रवाशांचा जागीच मृत्यू झाला.
या अपघातात कारचा अक्षरशः चक्काचूर झाला. अपघाताची माहिती समजताच आयआरबी पेट्रोलिंग, देवदूत यंत्रणा, स्थानिक ग्रामस्थ, पोलीस यंत्रणा यांनी घटनास्थळी धाव घेत कंटेनरखाली अडकलेली कार आणि प्रवासी यांना बाहेर काढलं. दरम्यान या घटनेमुळं मुंबईकडे जाणार्‍या मार्गिकेवर प्रचंड वाहतूक कोंडी झाल्याचं पाहायला मिळालं.
