मराठा आरक्षणाच्या मुद्द्यावरुन आमरण उपोषण करुन राज्यभरात रान पेटवणाऱ्या मनोज जरांगे पाटील यांच्या आमरण उपोषणाला पोलिसांकडून परवानगी नाकारण्यात आली आहे. मनोज जरांगे हे शनिवारपासून पुन्हा एकदा मराठा आरक्षणाच्या मागणीसाठी आमरण उपोषणाला बसणार होते.
यापूर्वी आंतरवाली सराटीच्या गावकऱ्यांनी मनोज जरांगे पाटील यांच्या आमरण उपोषणाला विरोध केला होता. त्यानंतर आता पोलिसांनी त्यांच्या आमरण उपोषणाला परवानगी नाकारली आहे.
मनोज जरांगे पाटील यांनी मराठा आरक्षणाच्या मागणीसाठी राज्य सरकारला आमरण उपोषणाचा इशारा दिला होता. त्यानुसार ते उद्या म्हणजेच शनिवार, 8 जूनपासून तीव्र आंदोलनाच्या तयारीत होते. या आंदोलनाला अंतरवलीच्या गावकऱ्यांनी विरोध दर्शवत 4 दिवसांपूर्वीच जिल्हाधिकाऱ्यांना निवेदन दिले होते.
त्या पार्श्वभूमीवर पोलिसांनी जरांगे पाटलांच्या आमरण उपोषणाला परवानगी नाकारल्याचे समजते.तसेच उपोषणाच्या जागे बाबत ग्रामसभेचे कोणतेही कागदपत्र सादर न केल्या मुळे त्यांना ही परवानगी नाकारण्यात आल्याची माहिती मिळत आहे.
