लक्षद्वीप- लक्षद्वीपजवळ समुद्रात DRI आणि भारतीय तटरक्षक दलाने तब्बल 1526 कोटी किमतीचे 219 किलो हेरॉईन जप्त केले आहे. ऑपरेशन खोजबीन अंतर्गत ही कारवाई करण्यात आली. गेल्या वर्षभरात डीआरआयने तस्करीसाठी समुद्रात आणले जाणारे सुमारे 25 हजार कोटींचे अंमली पदार्थ जप्त केले आहेत.
सुत्रांच्या माहितीनुसार, 7 मे रोजी, महसूल गुप्तचर संचालनालयाला मिळालेल्या गुप्त माहितीच्या आधारे ही कारवाई करण्यात आली. लक्षद्वीपजवळील समुद्रात ड्रग्जची मोठी खेप भारताच्या सीमेवर पोहोचणार आहे. या माहितीवरून डीआरआयने भारतीय तटरक्षक दलाची मदत घेतली. यावेळी ICGS सुजित या कोस्ट गार्ड जहाजावर DRI अधिकारीही तैनात करण्यात आले होते आणि तेव्हापासूनच अरबी समुद्रात पाळत ठेवण्यास सुरुवात करण्यात आली होती.
18 मे रोजी डीआरआयने तटरक्षक दलाच्या मदतीने प्रिन्स आणि लिटल-जिसस या दोन संशयास्पद बोटींचीही झडती घेतली होती आणि प्रत्येकी एक किलोची 219 पाकिटे सापडली. ही सर्व पाकिटे अवैध हेरॉईनने भरलेली होती. चौकशीत दोन्ही बोटींच्या कर्मचाऱ्यांनी ड्रग्जची ही खेप समुद्रातच मिळाल्याचे सांगितले.
ड्रग्ज मिळाल्यानंतर डीआरआय आणि तटरक्षक दलाने बोटी कोचीला आणल्या असून या बोटींबाबत चौकशी करण्यात येणार आहे. हेरॉईनची ही खेप कोठून आली आणि ती भारतात कोठून पाठवली जाणार होती याचा शोध घेतला जाणार आहे.
दरम्यान, गेल्या महिन्यापासून म्हणजेच एप्रिल 2022 पासून भारतात पकडण्यात आलेली ही औषधांची चौथी मोठी खेप आहे. गेल्या एका वर्षात एप्रिल 2021 पासून आतापर्यंत देशाच्या सागरी सीमेवरून विविध विमानतळांवर 3800 किलो ड्रग्ज जप्त करण्यात आले आहेत. या पकडलेल्या ड्रग्जची आंतरराष्ट्रीय बाजारात किंमत सुमारे 26 हजार कोटी आहे.
