मुंबई- शिवसेना नेते एकनाथ शिंदे यांच्यासह २५ आमदार नॉट रिचेबल झाल्यानंतर शिवसेनेच्या गोटामध्ये भूकंप झाला आहे. त्यातच परिवहन मंत्री अनिल परब हे दापोली रिसाॅर्ट प्रकरणी ईडी कार्यालयात पोहोचले आहेत. काल ईडीकडून त्यांना चौकशीसाठी समन्स बजावण्यात आले होते.
अनिल परब हे मुख्यमंत्री उद्धव ठाकरे यांचे निकटवर्तीय आणि शिवसेनेचे महत्त्वाचे नेते समजले जातात. काही दिवसांपूर्वी ईडीने अनिल परब यांच्या खासगी आणि शासकीय निवासस्थानावर छापा मारला होता. त्याशिवाय अंधेरीतील शिवसेना पदाधिकाऱ्याच्या घरीदेखील छापा मारला होता. त्यावेळी अनिल परब यांच्या शासकीय निवासस्थानी ईडीचे अधिकारी जवळपास 12 तास ठाण मांडून होते.
अनिल परब दापोलीमधील रिसाॅर्ट प्रकरणात झालेल्या कथित मनी लाॅन्ड्रिंग प्रकरणात ईडीच्या रडारवर आहेत. दापोलीतील कथित बेकायदेशीर रिसॉर्ट प्रकरणी ईडीकडून चौकशी करण्यात आली आहे. ईडीने अनिल परब यांना मागील आठवड्यात चौकशीसाठी समन्स पाठवले होते. त्यावेळी अनिल परब यांनी मंत्री असल्याने पूर्वनियोजित कार्यक्रम असल्याने चौकशीसाठी अनुपस्थित राहणार असल्याचे सांगितले होते.
