पुणे : पुण्यामधून (Pune News) एक धक्कादायक घटना समोर आली आहे. यामध्ये गणपतीसाठी केलेल्या सजावटीच्या विद्युत रोषणाईमुळे एका व्यक्तीचा दुर्दैवी मृत्यू झाला. गणेशोत्सवानिमित्त करण्यात आलेल्या विद्युत रोषणाईमध्ये शॉर्टसर्किट झाल्याने शॉक लागून रात्री झोपेत असतानाच तरुणाचा जागीच मृत्यू झाला आहे. या घटनेमुळे परिसरात शोककळा पसरली आहे.
काय घडले नेमके?
खेड तालुक्यातील खरपुडीत घरगुती गणपती सजवटीच्या विद्युत रोषणाईत शॉटसर्किट झाल्याने शॉक लागून तरुणाचा रात्रीच्या झोपेत होरपळून मृत्यू झाला. खेड तालुक्यातील खरपुडी बुद्रुक या ठिकाणी ही घटना घडली आहे. वैभव जगन्नाथ गरुड (वय 35 ) असे मृत तरुणाचे नाव आहे. या प्रकरणी खेड पोलीस ठाण्यात आकस्मित मृत्यूची नोंद करण्यात आली आहे.
खरपुडी येथील दत्तनगरमध्ये मयत वैभव गरुड हे कुंटुंबासह राहत होते. गरुड यांनी घरात गणपती बसवून मूर्तीसमोर आकर्षक सजावट केली होती. या सजावटीमध्ये इलेक्ट्रिक लाईटच्या माळा लावण्यात आल्या होत्या. शुक्रवारी मध्यरात्रीच्या सुमारास घरात लावलेल्या इलेक्ट्रिक लाईटच्या माळांमध्ये शॉटसर्कीट होऊन आग लागली. यानंतर काही वेळातच आगीने रौद्र रूप धारण केले. यानंतर घरातील साड्या व इतर वस्तू जळून खाक झाल्या. त्यावेळी गादीवर झोपलेल्या वैभव गरुड यांचा जळून मूत्यू झाला. आगीमुळे त्यांना घराबाहेर पडण्याची संधीच मिळाली नाही. या घटनेमुळे सगळीकडे हळहळ व्यक्त केली जात आहे. वैभव हा सर्पमित्र म्हणून खेड तालुक्यात प्रसिद्ध होता.
