मुंबई : पत्रकार पंकज खेळकर यांचे सोमवारी (12 मार्च) रात्री ह्रदयविकाराच्या झटक्याने निधन झाले. ते 52 वर्षांचे होते. त्यांनी पत्रकारिता क्षेत्रात आपली स्वतःची एक वेगळी ओळख निर्माण केली होती. ‘इंडिया टुडे’, ‘आज तक’ आणि ‘मुंबई तक’चे प्रतिनिधी म्हणून त्यांनी अनेक वर्षे पत्रकारिता केली.
पुण्यातील पाषाण येथील राहत्या घरी सोमवारी रात्री पंकज खेळकर यांना ह्रदयविकाराचा झटका आला. त्यांना तातडीने रुग्णालयात दाखल करण्यात आले मात्र त्या ठिकाणी डॉक्टरांनी त्यांना मृत घोषित केले. त्यांच्या पार्थिवावर बुधवारी (13 मार्च) रोजी अंत्यसंस्कार करण्यात येणार आहेत.
पंकज खेळकर यांच्याविषयी
पत्रकार पंकज खेळकर हे मूळचे अकोल्याचे होते. ते पुण्यात आले आणि तिथेच स्थायिक झाले. पुण्यातील सिम्बॉयसिस कॉलेजमधून पदवी घेतल्यानंतर त्यांनी पत्रकारितेला सुरूवात केली होती. ते गेल्या 23 वर्षांपासून पत्रकारितेत कार्यरत होते. प्रशिक्षणार्थी पत्रकार ते असोसिएट एडिटर असा त्यांचा प्रवास राहिला. गेल्या अनेक वर्षांपासून ते ‘इंडिया टुडे’, ‘आज तक’चे पुणे ब्युरो म्हणून काम पाहत होते.
