पुणे- मुख्यमंत्री उद्धव ठाकरे, उपमुख्यमंत्री अजित पवार यांच्या स्वीय सहाय्यकांच्या नावाने १० लाख रुपये घेऊन फसवणूक करणाऱ्या दोन युवकांच्या विरोधात बंडगार्डन पोलीस ठाण्यात गुन्हा दाखल करण्यात आला असून एकाला याप्रकरणी अटक करण्यात आली आहे.
प्रवीण विठ्ठल जगताप (रा.वाई, सातारा) असे अटक करण्यात आलेल्याचे नाव आहे. त्याच्या अन्य एका साथीदारावरही गुन्हा दाखल करण्यात आला आहे. याबाबत महेश विश्वास पटवर्धन (42,राजयोग सोसायटी, वारजे) यांनी फिर्याद दिली आहे.
पोलिसांनी दिलेल्या माहितीनुसार, मुख्यमंत्री उद्धव ठाकरे यांचे सचिव भूषण गगराणी यांचे व उपमुख्यमंत्री अजित पवार यांच्या स्वीय सहाय्यकांची ओळख आहे. तुमचे काम करून देतो असे सांगून आरोपींनी महेश पटवर्धन यांची फसवणूक केली.
पुणे महापालिकेमार्फत विविध विकास कामे केली जातात. त्यापैकी ५ कोटी रुपयांचे बजेट लॉकिंग करून देतो, माझी मुसळे यांच्याशी ओळख आहे. तुमचे काम होऊन जाईल, असे स्वत:ला उपमुख्यमंत्री अजित पवार यांच्या स्वीय सहाय्यकाशी ओळख असल्याचे सांगणारा आरोपी प्रवीण विठ्ठल जगताप आणि त्याच्या एका साथीदाराने फिर्यादी महेश पटवर्धन याला सांगितले. त्या बरोबरच भूषण गगराणी यांचे पीए हेमंत केसळकर यांच्याशीही ओळख असल्याचे त्याने पटवर्धन यांना सांगितले.
परंतु पैसे देऊनही काम करत नसल्याचे पाहून पटवर्धन यांनी बंडगार्डन पोलिसात फिर्याद दाखल केली. त्यानंतर आरोपी प्रवीण जगताप याला अटक करण्यात आली आहे. पुढील तपास बंडगार्डन पोलिस करत आहेत.
