ज्येष्ठ मराठी अभिनेत्री प्रेमा किरण यांचं हृदय विकाराच्या झटक्याने निधन झालं आहे. त्या ६१ वर्षांच्या होत्या. मुंबईत त्यांनी अखेरचा श्वास घेतला.
80, 90 च्या दशकात प्रेमा किरण यांना अनेक चित्रपटांमध्ये महत्वाच्या भूमिका निभावल्या आहेत.अर्धांगी, धूमधडाका, दे दणादण, गडबड घोटाळा, सौभाग्यवती सरपंच, माहेरचा आहेर अशा अनेक चित्रपटांमध्ये त्यांनी महत्वाच्या भूमिका निभावल्या. दे दणादण, धुमधडाका चित्रपटातील त्यांची आणि लक्ष्मीकांत बेर्डे यांच्या जोडीला प्रेक्षकांची चांगलीच पसंती राहिली आहे.
चित्रपटातील त्यांची गाणी आजही तितकीच सुप्रसिद्ध आहेत. प्रेमा किरण यांनी उतावळा नवरा, थरकाप या चित्रपटांची निर्मिती देखील केली. फक्त मराठीच नाही तर गुजराती, भोजपुरी, अवधी, बंजारा या भाषेत त्यांनी काम करत चित्रपटांमध्ये महत्वाच्या भूमिका साकारल्या होत्या. त्यांच्या जाण्याने कला क्षेत्रातून हळहळ व्यक्त केली जात आहे.
