India Post Diwali parcel service: दिवाळीच्या तोंडावर आपल्या प्रियजनांना अमेरिकेत पारंपरिक ‘दिवाळी फराळ’ पाठवू इच्छिणाऱ्या कुटुंबांसाठी (India Post Diwali parcel service) एक मोठी आनंदाची बातमी आहे. इंडिया पोस्टने अमेरिकेसाठी आपली आंतरराष्ट्रीय पार्सल सेवा पुन्हा सुरू केली आहे, परंतु एका खेपेसाठी शंभर डॉलर मूल्याची मर्यादा निश्चित केली आहे. खासगी कुरिअर कंपन्यांच्या दरांपेक्षा इंडिया पोस्टचे दर सुमारे २० टक्क्यांनी स्वस्त असल्यामुळे, सणासुदीच्या काळात हा एक परवडणारा पर्याय उपलब्ध झाला आहे. भारत आणि अमेरिकेमधील शुल्क संबंधित समस्यांमुळे ही सेवा काही दिवसांपूर्वी स्थगित करण्यात आली होती. पुणे विभागातील अधिकाऱ्यांनी या निर्णयाला दुजोरा दिला असून, शुल्क वाद काही अंशी मिटल्यामुळे मर्यादित स्वरूपात ही सेवा पुन्हा सुरू करण्याचा निर्णय इंडिया पोस्टने घेतला आहे. मात्र, कॅनडासाठीची टपाल सेवा तेथील स्थानिक कुरिअर सेवा पुरवठादारांच्या संपामुळे अद्यापही स्थगित आहे.
शुक्रवार, १० ऑक्टोबर रोजी झालेल्या पत्रकार परिषदेत पुणे शहर पश्चिम विभागाचे पोस्ट ऑफिसेसचे वरिष्ठ अधीक्षक नितीन येवला यांनी या महत्त्वपूर्ण (India Post Diwali parcel service) निर्णयाची घोषणा केली. दिवाळीच्या काळात फराळ पाठवण्याची लोकांची तीव्र मागणी लक्षात घेऊन ही सेवा पुन्हा सुरू करण्यात आल्याचे त्यांनी सांगितले. “इंडिया पोस्ट अमेरिका, कॅनडा, ऑस्ट्रेलिया, यूएई आणि जर्मनीसह १००हुन अधिक देशांत पार्सल सेवा पुरवते. यंदाच्या सणासुदीत, गेल्या १० ते १५ दिवसांत आम्ही सुमारे ५०० लोकांचा दिवाळी फराळ परदेशात पाठवला आहे. गेल्या वर्षी हा आकडा जवळपास २००० होता,” असे येवला म्हणाले.
अमेरिकेने नुकतेच शंभर डॉलर पेक्षा जास्त मूल्याच्या वस्तूंवर शुल्क लागू केल्यामुळे ग्राहकांमध्ये संभ्रम निर्माण झाला होता, ज्यामुळे ही सेवा तात्पुरती थांबवण्यात आली होती. येवला यांनी स्पष्ट केले की, “कॅस्टम ड्युटी आणि वितरण वेळेबद्दल अनिश्चितता होती. परंतु दिवाळीपूर्वी मागणी वाढल्याने आणि खासगी कुरिअरचे शुल्क खूप जास्त असल्याने, आम्ही शंभर डॉलरच्या मूल्य मर्यादेसह सेवा पुन्हा सुरू करण्याचा निर्णय घेतला आहे.”
SHIVSENA UBT & MNS PROTEST ON TMC: ठाण्यात शिवसेना उबाठा आणि मनसेचा एकत्रित मोर्चा
टपाल विभागाच्या नियमांनुसार, चिवडा आणि चकली सारखे हाताने किंवा घरी तयार केलेले खाद्यपदार्थ व्यावसायिक बीजक शिवाय पाठवता येतात. तथापि, दुकानातून (India Post Diwali parcel service) खरेदी केलेल्या वस्तूंसाठी जकात नियमांचे पालन करण्यासाठी खरेदीचे बिल जोडणे आवश्यक आहे. “इंडिया पोस्टचे आंतरराष्ट्रीय पार्सल दर खासगी कुरिअर कंपन्यांपेक्षा अंदाजे २० टक्के स्वस्त आहेत. परदेशातील आपल्या कुटुंबियांना सणाचे पॅकेज पाठवण्यासाठी नागरिकांनी या सुविधेचा लाभ घ्यावा,” असे आवाहन येओला यांनी केले. शुल्क-संबंधित निर्बंधांमुळे मागणीत जवळपास ५० टक्क्यांनी घट झाली होती, याची कबुली येवला यांनी दिली. “अमेरिकेत भारतीय समुदायाची संख्या मोठी असल्यामुळे कोणत्याही निर्बंधाचा आमच्यावर मोठा परिणाम होतो. आता सेवा पुन्हा सुरू झाल्याने, आम्हाला पुन्हा पार्सलच्या संख्येत वाढ होण्याची अपेक्षा आहे,” असे ते म्हणाले.
पुणे शहर पूर्व विभागाचे वरिष्ठ अधीक्षक समीर महाजन यांनी सांगितले की, टपाल विभाग ग्राहकांना कोणत्याही अडचणीशिवाय सेवा मिळेल यावर लक्ष केंद्रित करत आहे. ते म्हणाले, “आव्हाने असूनही, आम्ही टपाल सेवा अधिकाधिक सोयीस्कर करण्याचा प्रयत्न करत आहोत. नागरिकांचा प्रतिसाद सकारात्मक आहे आणि वितरण जलद होण्यासाठी आम्ही इन-हाऊस पॅकेजिंग सहाय्य देखील सुरू केले आहे.” कॅनडा-बाउंड पार्सलच्या स्थितीवर अधिकाऱ्यांनी सांगितले की, स्थानिक टपाल कर्मचाऱ्यांच्या दीर्घकाळ चाललेल्या संपामुळे तेथील परिस्थिती अनिश्चित आहे आणि सेवा त्वरित सुरू करणे सध्या शक्य नाही.
