मुंबई- महाराष्ट्र नवनिर्माण सेनेच्या कार्यक्रमा दरम्यान सभेसाठी उभारण्यात आलेले व्यासपीठ कोसळल्याची घटना घडली आहे. मुंबईतील गोरेगाव परिसरात ही घटना घडली आहे. या व्यासपीठावरून राज ठाकरे भाषण देणार होते. राज ठाकरे व इतर नेते सुरक्षित असून या अपघातात कोणालाही फारशी दुखापत झाल्याचे वृत्त नाही.
आज मुंबईत चांदिवली आणि गोरेगाव येथे महाराष्ट्र नवनिर्माण शाखेच्या उद्घाटनाचा कार्यक्रम आयोजित करण्यात आला होता. चांदिवली येथील शाखेचे उद्घाटन केल्यानंतर राज ठाकरे हे गोरेगाव पूर्व येथे दाखल झाले. यावेळी स्थानिक पक्ष कार्यकर्ते आणि नागरिकांची गर्दी होती. राज ठाकरे येणार असल्याने स्टेज बांधण्यात आला होता. मात्र, हाच स्टेज कोसळला. क्षमतेपेक्षा अधिक कार्यकर्ते स्टेजवर आले आणि त्यामुळे हा स्टेज कोसळला असल्याचं बोललं जात आहे.
स्टेज कोसळल्यानंतर मनसे अध्यक्ष राज ठाकरे यांनी सर्वांना शांत राहण्याचे आवाहन केले. तसेच काळजी घेण्याचा सल्लाही दिला. त्यानंतर राज ठाकरेंनी भाषण सुद्धा केलं. त्यानंतर मनसे अध्यक्ष राज ठाकरे हे आपल्या नियोजित कार्यक्रमासाठी निघून गेले.
