राज्यात सध्या चर्चेत असलेल्या घटनेच्या तपासाबाबत आमदार रोहित पवार(ROHIT PAWAR) यांनी गंभीर आरोप करत उद्या सकाळी साडेदहा वाजता महत्त्वाची माहिती उघड करण्याची घोषणा केली आहे. तपासाची दिशा आणि गती यावर त्यांनी थेट प्रश्न उपस्थित केले आहेत.
पवार यांच्या म्हणण्यानुसार, संबंधित प्रकरणाचा तपास अत्यंत संथ गतीने आणि केवळ वरवर केला जात आहे. ही घटना अपघात नसून घातपात असण्याची शक्यता त्यांनी व्यक्त केली आहे. त्यामुळे संपूर्ण तपास प्रक्रियेची निष्पक्षता आणि पारदर्शकता यावर संशय निर्माण झाला आहे.
सरकारच्या तपास यंत्रणांवर टीका करत त्यांनी ‘व्हीएसआर’(VSR) नावाची कंपनी अद्याप कार्यरत असल्याचा उल्लेख केला. तसेच ब्लॅक बॉक्सच्या (BLACK BOX) सुरक्षिततेबाबतही त्यांनी शंका उपस्थित केली असून, या विषयावर राजकारण सुरू असल्याचा आरोप केला.
दरम्यान, उद्या होणाऱ्या गौप्यस्फोटातून या प्रकरणाशी संबंधित नवीन आणि महत्त्वाची माहिती समोर येणार असल्याचा दावा रोहित पवार यांनी केला आहे. त्यामुळे राजकीय वर्तुळात उत्सुकता वाढली आहे.
