गेल्या अनेक दिवसांपासून पुण्यात गुन्हेगारी झपाट्याने वाढली आहे. पोलिसांचा गुन्हेगारांना कसलाच धाक राहिलेला नाही. त्यामुळेच रस्त्यात दारू पिऊन गोंधळ घालणाऱ्या संगणक अभियंत्याला समज देण्यासाठी गेलेल्या पोलिसांना मारहाण करण्यात आल्याची धक्कादायक घटना पुण्यात घडली. पुण्यातील घोरपडीतील बी. टी. कवडे रस्त्यावर ही घटना घडली असून याप्रकरणी संगणक अभियंत्यासह त्याच्या भावाला वानवडी पोलिसांनी अटक केली.
याबाबत पोलीस कर्मचारी अनिकेत वाबळे यांनी फिर्याद दिली असून नयन शिवाजी भंडलकर (वय २५) आणि आशिष शिवाजी भंडलकर (वय २२, दोघे रा. कुंदन इटर्निया, बी. टी. कवडे रस्ता) अशी अटक करण्यात आलेल्यांची नावे आहेत. तर आणखी तीन साथीदारांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, नयन भंडलकर हा तरुण संगणक अभियंता आहे. सोमवारी मध्यरात्री दीड वाजण्याच्या सुमारास बी. टी. कवडे रस्त्यावर रोझरी सोसायटीच्यासमोर काहीजण दारू पिऊन गोंधळ घालत होते. याची माहिती नागरिकांनी पोलीस कंट्रोल रूमला दिली. तात्काळ पोलीस कर्मचारी अनिकेत वाबळे यांच्यासह आणखी काही पोलिसांनी तेथे धाव घेतली. त्यावेळी आरोपी भंडलकर रस्त्यात उभा राहून आरडाओरडा करत होता. बावळे यांनी त्याला समजून सांगण्याचा प्रयत्न केला. त्यावेळी भंडलकर आणि त्याच्या भावाने वाबळे यांना शिवीगाळ करत धक्काबुक्की केली.
त्यामुळे भंडलकर आणि त्याच्या भावावर सरकारी कामात अडथळा आणला प्रकरणी पुन्हा दाखल करून दोघांनाही अटक करण्यात आली आहे. तर त्यांच्याबरोबर असलेले तीन मित्र पसार झाले आहेत. त्यांच्या विरोधातही गुन्हा दाखल करण्यात आला आहे.
