DHARASHIV NEWS : बीड जिल्ह्यातील केज तालुक्यातील मस्साजोगचे सरपंच संतोष देशमुख यांच्या पवनचक्कीच्या वादातून झालेल्या हत्येची घटना अजूनही ताजी असतानाच, आता धाराशिव जिल्ह्यातही याच प्रकारची एक धक्कादायक घटना घडली आहे. भूम तालुक्यातील सुकटा गावातील माजी सरपंच बजरंग गोयेकर यांना पवनचक्की प्रकल्पाला विरोध केल्यामुळे अमानुष मारहाण करण्यात आली आहे.
पवनचक्की कंपनीकडून सुकटा शिवारात अवैध मुरूम उपसा केला जात असल्याची माहिती बजरंग गोयेकर यांना मिळाली होती. त्यांनी या अवैध कामाचे फोटो काढले आणि याआधीही याची तक्रार केली होती, तसेच उपोषणही केले होते. याच रागातून, पवनचक्की कंपनीच्या गुंडांनी बजरंग गोयेकर यांना मारहाण केली. जवळपास २० मिनिटे हॉकी स्टिक आणि इतर वस्तूंचा वापर करून त्यांना बेदम मारहाण करण्यात आली. मारहाण इतकी भीषण होती की, गोयेकर यांनी ती थांबवण्यासाठी वारंवार विनंती केली, तरीही गुंडांनी त्यांना सोडले नाही. या घटनेमुळे त्यांना बीडमधील संतोष देशमुख यांच्या हत्येची आठवण झाली, असे गोयेकर यांनी प्रतिक्रिया देताना सांगितले.
नेपाळमध्ये सोशल मीडिया बंदीमुळे ‘Gen-Z’ आक्रमक ; 14 मृत्यू , 100 हून अधिक जखमी
ही मारहाण केवळ शारीरिक हल्ल्यावर थांबली नाही, तर मारहाण करणाऱ्या टोळक्याने बजरंग गोयेकर यांच्यावर उलट अ‍ॅट्रॉसिटीचा गुन्हा दाखल करण्याची धमकीही दिली. गोयेकर यांना बार्शी येथील रुग्णालयात उपचारासाठी दाखल करण्यात आले आहे. त्यांनी या हल्लेखोरांवर कठोर कारवाई करण्याची आणि पवनचक्की कंपन्यांच्या मनमानी कारभाराला आळा घालण्याची मागणी केली आहे. जर यावर तात्काळ कारवाई झाली नाही, तर उपोषण करण्याचा इशाराही त्यांनी दिला आहे.
CONGRESS LEADER MEET UDDHAV THACKERAY: काँग्रेस नेत्यांनी घेतली उद्धव ठाकरेंची भेट
संतोष देशमुख यांच्या हत्येनंतरही अशा घटनांची पुनरावृत्ती होताना दिसते, ज्यामुळे राज्यातील कायदा आणि सुव्यवस्थेवर प्रश्नचिन्ह निर्माण झाले आहे. सुदैवाने या प्रकरणात गोयेकर यांचा जीव वाचला. मात्र, अशा प्रकारची वाढती गुंडगिरी पाहता, यामागे काही मोठ्या व्यक्तींचा हात आहे का, असा संशय निर्माण होतो. प्रशासन अशा गुन्हेगारीl टोळ्यांवर नियंत्रण ठेवण्यात कमी पडत आहे का, हा प्रश्नही यानिमित्ताने उपस्थित होतो.
राज्यात सामान्य नागरिकांना, विशेषतः स्थानिक नेतृत्वांना, अशा प्रकारे धमक्या आणि हल्ल्यांना सामोरे जावे लागत असेल, तर हे लोकशाहीसाठी धोकादायक आहे. या दोन्ही प्रकरणांमध्ये पवनचक्की कंपन्या आणि त्यांच्या गुंडांचे वाढलेले धाडस दिसून येते. त्यामुळे, या प्रकरणातील दोषींवर तात्काळ आणि कठोर कारवाई करणे आवश्यक आहे. अन्यथा, अशा घटनांची संख्या वाढू शकते आणि सामान्य नागरिकांमध्ये भीतीचे वातावरण निर्माण होऊ शकते.
