मुंबई: राज्याचे माजी गृहमंत्री आणि राष्ट्रवादी काँग्रेस शरदचंद्र पवार पक्षाचे नेते अनिल देशमुख यांच्यावर सीबीआयकडून गुन्हा दाखल करण्यात आलाय…
तत्कालीन पोलीस अधीक्षक यांना धमकावल्याचा आरोप अनिल देशमुख यांच्यावर ठेवण्यात आला आहे. आणि याचमुळे अनिल देशमुख यांच्यावर सीबीआयकडून गुन्हा दाखल करण्यात आलाय.
नेमकं काय आहे प्रकरण?
राज्यात महाविकास आघाडीचा सरकार असताना भाजप नेते आणि राज्याचे विद्यमान ग्रामविकास मंत्री गिरीश महाजन यांना अटक करण्यासाठी अनिल देशमुख यांनी जळगावचे तत्कालीन एसपी प्रवीण मुंडे यांना धमकावल्याचा अनिल देशमुख यांच्यावर आरोप आहे. आणि याचमुळे सीबीआयकडून अनिल देशमुख यांच्यावर गुन्हा दाखल करण्यात आला आहे.
सीबीआयकडून गुन्हा दाखल होताच अनिल देशमुख यांनी मानले देवेंद्र फडणवीस यांचे आभार
सीबीआयकडून गुन्हा दाखल होताच अनिल देशमुख यांनी एक्स वर पोस्ट करत राज्याचे विद्यमान गृहमंत्री देवेंद्र फडणवीस यांचे आभार मानले आहेत
अनिल देशमुख आपल्या एक्स पोस्टमध्ये म्हणतात धन्यवाद… देवेंद्रजी फडणवीस. माझ्यावर CBI कडून आणखी एक तथ्यहीन गुन्हा दाखल केला गेला आहे. जनतेचा कौल बघून फडणवीसांच्या पायाखालची वाळू घसरल्याने हे कटकारस्थान सुरू झाले आहे. या अशा धमक्यांना आणि दबावाला मी अजिबात भीक घालत नाही. न झुकता – न डगमगता मी भाजपच्या या दडपशाही विरुद्ध लढण्याची खूनगाठ बांधली आहे असे देशमुख म्हणाले.
तसेच महाराष्ट्रात फडणवीसांकडून किती खालच्या पातळीचे आणि विकृत मानसिकतेचे घाणेरडे राजकारण सुरू आहे ते जनतेने बघावे. लोकसभा निवडणुकीत या कारस्थानी नेतृत्वाला जनतेने जागा दाखवून दिली आहे, आता महाराष्ट्राची जनता विधानसभा निवडणुकीची वाट बघत आहे.
दरम्यान अनिल देशमुख यांवर सीबीआयकडून गुन्हा दाखल झाल्याने महाविकास आघाडी आक्रमक झाल्याचं पाहायला मिळत आहे.
