पुणे पोलिसांकडून ‘बीट मार्शल’ ही संकल्पना गेल्या अनेक वर्षांपासून राबवण्यात येत आहे. प्रत्येक पोलिस ठाण्याच्या हद्दीत दोन-दोन कर्मचारी दोन सत्रांत गस्त घालतात. रस्त्यावरील गुन्हेगारी कमी करणे, एखादा गुन्हा घडल्यानंतर तत्काळ मदत करणे आणि समाजात सुरक्षिततेचे वातावरण निर्माण करणे आदी उद्देशांतून ‘बीट मार्शल’ ही संकल्पना राबवली जात होती. मात्र, सध्या ती प्रभावहीन ठरत असल्याच्या पार्श्वभूमीवर पोलिस आयुक्त अमितेशकुमार यांनी ‘कॉप २४’ हा उपक्रम राबविण्याचा निर्णय घेतला. त्यांचा हा महत्त्वाकांक्षी प्रकल्प आहे.
‘कॉप-२४’च्या माध्यमातून पोलिस शहरात गस्त घालणार असून, घटनास्थळी तत्काळ दाखल होणार आहेत. या कॉपना वेगळी वर्दी असणार आहे. गेल्या उपक्रमासाठी नेमणूक झालेल्या कर्मचाऱ्यांना प्रशिक्षण दिले जात आहे. प्रायोगिक तत्त्वावर हा उपक्रम प्रथम सुरू केला जाणार आहे. त्यानंतर त्याचे रूपांतर दैनंदिन कामकाजात केले जाणार आहे. स्थानिक पोलिसांचे बीट मार्शल बंद करून पूर्ण काळ ७२६ कर्मचारी दोन सत्रांमध्ये गस्त घालणार आहेत. पुणेकरांना मदत, गुन्हेगारीला चाप आणि पोलिसांचा अहोरात्र पहारा मिळणार आहे.सध्या या कर्मचाऱ्यांचे प्रशिक्षण सुरू आहे. लवकरच त्यांची सेवा सुरू होईल. हे पोलिस कर्मचारी २४ तास गस्त घालणार आहेत.
