मुंबई – भारतीय जनता पार्टीच्या केंद्रीय नेतृत्वाने आदेश दिला तर भाजपा राज्यसभेची तिसरी जागा लढवेलही आणि जिंकलही, असा आत्मविश्वास भाजप प्रदेशाध्यक्ष चंद्रकांतदादा पाटील यांनी गुरुवारी व्यक्त केला. भाजप सहाव्या जागेवर आपला उमेदवारी अर्ज दाखल करण्याची शक्यता आहे. याच शक्यतेवर चंद्रकांतदादांना प्रश्न विचारला असता त्यांनी राज्यसभा जागा लढविण्याची शक्यता बोलून दाखवली.
भाजपाचे विधानसभेतील संख्याबळ ध्यानात घेता राज्यसभा निवडणुकीत पक्षाचे दोन उमेदवार सहज निवडून येतात. त्याखेरीज अतिरिक्त मतांच्या जोरावर भाजपा तिसरी जागा लढवून जिंकू शकते. या निवडणुकीच्या बाबतीत पक्षाचे केंद्रीय नेतृत्व निर्णय घेत असल्याने त्याच्या सूचनेनुसार पुढील कारवाई होईल, असं चंद्रकांतदादा म्हणाले.
शिवसेनेने राज्यसभा निवडणुकीत काय करावे हा त्या पक्षाचा प्रश्न आहे. परंतु राज्यसभा निवडणुकीत पराभूत प्राधान्यक्रमाच्या मतदानाच्या पद्धतीमुळे दोन उमेदवार लढविण्याच्या प्रयत्नात कधी कधी मूळ उमेदवार पराभूत होतो हे ध्यानात घ्यावे, असा सल्लाही त्यांनी सेनेला दिला.
